Osea 8 - AI VOLA TABU

Era na cudruvi e na vuku ni nodra dautalaidredre vua na Kalou, kei na nodra dauqarava na kalou lasu, 1-14.

¹ TARA na davui ki gusumu, ka kaya, Ena lako mai ko koya, me vaka na ikeli, ki na vale i Jiova, e na vuku ni ra sa vakacacataka na noqu veiyalayalati, ia ki na noqu vunau era sa talaidredre kina.

² Era na dui tagici au na Isireli, Noqu Kalou, keitou sa kilai iko.

³ Sa ra biuta na Isireli na ka sa vinaka: ena vakasavi ira na meca.

⁴ Era sa bulia e so na tui, ka sega ni vu vei au: era sa lesia na turaga, ka sega ni kaʼu kilai ira: e na nodra siliva kei na nodra koula era sa cakava na matakau me nodra, ka me ra muduki laivi ga kina.

⁵ Sa biuti iko na nomu luve ni karavau, Samaria, sa waqa mai na noqu cudru vei ira: e bogi vica mada me ra qai savasava mai?

⁶ Ni sa vu vei ira na Isireli na ka o qori talega: o koya na matai sa cakava; a sa sega ni Kalou: ia ena vorolaki ga na luve ni karavau ni Samaria.

⁷ E na vuku ni sa cagi era sa kaburaka, sa covulaca ga era na tamusuka: sa sega na tolona: ena sega ni vuataka na madrai droka: ke vuataka mai, ke sai ira ga na kai tani era na tiloma.

⁸ Sa tilomi ko ira na Isireli: sa ra qai yaco o qo e na veimatanitu me ra vaka nai yaya e tawa vinakati.

⁹ Ni ra sa qai lako cake ki Asiria, me vaka na asa kila e dua bauga: o ira na Ifireimi sa ra volia na veitau.

¹⁰ Ia ni ra sa volia e so na matanitu, kaʼu na qai vakasoqoni ira, a ra na rarawa vakalailai mada, ni ra colacola vua na nodra, tui na turaga.

¹¹ E na vuku ni sa vakavuqataka ko ira na Ifireimi nai cabocabo-ni-soro me ia nai valavala ca, ena yaco nai cabocabo-ni-soro vei ira me vu ni valavala ca.

¹² Au sa vola me nodra na ka e vuqa e na noqu vunau, sa nanumi ga me ka tani.

¹³ Ia mei soro e cabori vei au, era sa vakacabora na lewe ni manumanu, ka kania; sa sega ni vakadonui ira ko Jiova; sa na qai nanuma o qo na nodra caka cala, ka cudruva na nodrai valavala ca: era na lesu tale ki Ijipita.

¹⁴ Ia ko ira na Isireli, ni ra sa guilecavi Koya ka Buli ira, a ra sa tara bure kalou; ia ko ira na Juta, ni ra sa vakavuqataka na koro kaukauwa: kaʼu na biuta kina na buka ki na nodra Veikoro, ena vakama talega na nodra vale vakaturaga.