Osea 3 - AI VOLA TABU

A loloma kei na cudru ni Kalou vei ira na Isireli sa vakatakarakarataki vei Osea, 1-5.

¹ A SA kaya vei au ko Jiova, Mo lako tale, mo mani lomana na alewa sa daulomani vua na wekana, ka sa dauyatagane ga, me vaka na loloma i Jiova vei ira na luve i Isireli, era golevi ira na kalou tani, ka vinakata na bilo waini.

² Au a qai voli koya me noqu e na tiki ni siliva e tinikalima, ka dua na omeri parile, ka dua na tiki ni omeri parile:

³ au a kaya vua, Mo tiko ga mo noqu ka bogi vuqa; mo kakua ni ia na dauyatagane, se yaco me nona na tamata tani: ia koi au talega, kaʼu na tiko ga me nomu.

⁴ Ni na bogi vuqa na nodra tiko na luve i Isireli ka sega na nodra tui, se na turaga, se nai soro, se na matakau, se na efoti, se na terafimi:

⁵ ka oti, era na qai lesu mai na luve i Isireli, ka vakasaqarai Jiova na nodra Kalou, kei Tevita na nodra tui; a ra na rerevaki Jiova kei na nona loloma e na gauna maimuri.