Osea 12 - AI VOLA TABU

Era sa vunauci ruarua na Ifireimi kei na Juta, 1, 2. Ai valavala i Jekope na nodra qase sa tukuni vei ira me ra vakamuria, 3-6. A nodrai valavala vakailasu, na Ifireimi na vu ni nodra cudruvi, 7-14.

¹ O IRA na Ifireimi era sa kana cagi, io, era sa muria na cagi mai cake: e na veisiga kecega era sa kuria na vosa lasu kei na vakacaoa; ia na veiyalayalati sa ra ia kei ira na kai Asiria, a waiwai talega sa kau ki Ijipita.

² Sa dua talega na ka e veiletitaka kei Juta ko Jiova, ia ena cudruvi Jekope ko koya me vaka na nonai valavala; ka vaka na nona cakacaka ena sauma kina vua.

³ E na kete i tinana ka taura ko koya na bukubuku ni yava i tuakana, ia ni sa kaukauwa ko koya sa rawai koya na Kalou:

⁴ io, sa rawai koya na agilose ko koya, a sa gumatua: sa tagi ko koya, ka vakamamasu vua: ia mai Peceli ka kunei koya ko koya, maikea talega ka vosa kina vei keda;

⁵ io, ko Jiova na Kalou ni lewe vuqa; sai Jiova na yacana e daukilai kina.

⁶ Ia ko iko, mo lesu mai kina vua na nomu Kalou: nai valavala loloma ka dodonu mo vakabauta, ka waraki koya tikoga na nomu Kalou.

⁷ Sa dua na dauveivoli ko koya, e ligana sai vakarau ni bibi daulasu e tu kina: sa vinakata me ia na veivakasaurarataki.

⁸ A sa kaya ko Ifireimi, Au sa vutuniyau ga, au sa rawata ga e so na noqui yau: e na noqu cakacaka kecega era na tawa kunea vei au na caka cala mei valavala ca.

⁹ Ia sai au ko Jiova na nomu Kalou mai na vanua ko Ijipita, kaʼu na vakatikori iko tale e na vale malo, me vaka e na siga ni so tabu.

¹⁰ Au a vosa talega e na gusudra na parofita, ia koi au, kaʼu a vakalevutaka na raivotu, e na gusudra talega na parofita kaʼu a ia na vosa vakatautauvata.

¹¹ Sa tu beka mai Kiliati na caka cala? era sa yaco ga me lasu wale: mai Kilikali era sa vakamatea na karavau mei soro; io, na nodrai cabocabo-ni-soro sa vaka nai kelekele vatu e na bati ni tova ni veiwere.

¹² A sa dro ko Jekope ki na vanua ko Siria, io, sa ia na veiqaravi ko Isireli me dua kina na watina, ia me dua na watina sa vakatawa kina na sipi.

¹³ Ia e na dua na parofita sa kauti ira na Isireli mai Ijipita ko Jiova, e na dua na parofita talega sa ra vakatawai kina.

¹⁴ Sa ra ia na Ifireimi na veivakacudrui vakararawa sara: a kedra dra ena laivi tu kina vei ira, a nodrai rogorogo ca talega ena vakasuka vei ira ko koya na nodra Turaga.