Osea 1 - AI VOLA TABU

A WASE I. —A gauna i Osea na parofita, 1. Sa vakatakarakarataki na nodra ca na Isireli era soro ki na kalou tani, e na dua na alewa dauyatagane; ia na Kalou sa vakaroti Osea me kauta me watina, a sa sucu e so na luvena, a sa dui vakatoka vei iratou na yaca vakaibalebale, 2-9. Sa tini e na vosa ni yalayala, 10, 11.

¹ A VOSA i Jiova sa yaco vei Osea na luve i Pieri, e na gauna i Usiya, kei Yocami, kei Aasi, kei Isikiya, na tui Juta, kei na gauna i Yaropiami na luve i Yoasi, na tui Isireli.

² AI vakatekivu ni vosa i Jiova vei Osea. A sa kaya ko Jiova vei Osea, Mo laʼki kauta e dua na alewa dauyatagane me watimu, kei iratou na gone ca me luvemu: ni sa dauyatagane vakalevu na vanua, ni sa lako tani vei Jiova.

³ A sa lako ko koya ka kauti Komera na luve i Tipileimi; a sa kunekune ko koya, ka vakasucuma e dua na luvena tagane.

⁴ A sa kaya vua ko Jiova, Mo vakatoka na yacana ko Isirieli [ena ia na vei vakasevi na Kalou]; ni sa vo e lailai, kaʼu na qai cudruvaka na dra i Isirieli ki na mataqali i Yeu, ka vakaotia na matanitu ni mataqali nei Isireli.

⁵ Ia ena yaco e na siga ko ya, kaʼu na musuka na dakai i Isireli e na buca ko Isirieli.

⁶ A sa kunekune tale ko koya, ka vakasucuma e dua na luvena alewa. A sa kaya vua ko Koya, Mo vakatoka na yacana ko Lo-ruama [tawa lomani]: niʼu na sega ni lomani ira tale na mataqali nei Isireli; au na kauti ira laivi sara ga.

⁷ Ia na mataqali nei Juta kaʼu na lomani ira, ka vakabulai ira e na liga i Jiova na nodra Kalou, ka sega ni vakabulai ira e na dakai, se nai seleiwau, se nai valu, se na ose, se vei ira era dauvodo e na ose.

⁸ A sa kali Lo-ruama ko koya, a sa kunekune tale, ka vakasucuma e dua na luvena tagane.

⁹ A sa kaya ko Koya, Mo vakatoka na yacana ko Lo-ami [sega ni noqu tamata]: ni dou sa sega ni noqu tamata, ia koi au kaʼu na sega talega ni nomudou.

¹⁰ Ia na kedrai wiliwili na luve i Isireli ena vaka na mata ni nuku ni waitui, sa tawa vakarauti se wiliki rawa; ia ena yaco, na yasana ka kainaki kina vei ira, Dou sa sega ni noqu tamata, ena kainaki vei ira, Dou sa luve ni Kalou bula.

¹¹ Era na qai soqoni vata na luve i Juta kei na luve i Isireli, ka lesia e dua me uludra, ka lako cake mai na vanua: ni na levu na siga ni Isirieli.