Niemaia 9 - AI VOLA TABU

Sa ia na lolo, kei na veivutuni, kei na masu vua na Kalou, ko ira na Jiu; era sa qai ia tale na veiyalayalati tei Jiova.

¹ IA e nai karuasagavulu ka va ni siga ni vula o qo, era sa soqoni vata ko ira na luve i Isireli, a ra sa lolo, ka vakaisulu ca, ka sa boro e na qele.

² A ra sa wasei ira tani vei ira na kai tani kecega ko ira na kawa i Isireli, a ra sa tu ka vakatusa na nodrai valavala ca, kei na caka cala ni nodra qase.

³ A ra sa tu cake e na nodra tikina, ka wilika nai vola ni vunau i Jiova na nodra Kalou, e nai kava ni wase ni siga; e nai kava talega ni wase, era sa vakatusa na nodra ca, ka soro vei Jiova na nodra Kalou.

⁴ Sa qai tu cake e nai cabecabe, e so vei ira na Levi, ko Josua, kei Pani, ko Katimieli, ko Sipaniya, ko Puni, ko Serepiya, ko Pani, ko Kinani, ka tagi vakadomoilevu vei Jiova na nodra Kalou.

⁵ Sa qai kaya ko ira na Levi, ko Josua, kei Katimieli, ko Pani, ko Esapiniya, ko Serepiya, ko Otiya, ko Sipaniya, ko Picaya: Dou tu cake; dou vakavinavinaka vei Jiova na nomudou Kalou ka tawa mudu: ia me vakavinavinakataki na yacamu vakaiukuuku, a ya sa uasivi cake a sa uasivi sobu na vosa ni veivakarokorokotaki kei na vakavinavinaka kecega.

⁶ Sai Jiova ko iko, sai iko duaduaga; o a cakavi lomalagi, na lomalagi kece kei na kedrai vavakoso kecega, na vuravura, kei na ka kecega sa tu kina, na veiwasawasa, kei na ka kecega sa tu kina, ko sa maroroya kece talega; a sa soro vei iko nai vavakoso ni lomalagi.

⁷ Sai Jiova na Kalou ko iko, ko a digitaki Eparama, ka kauti koya tani mai Uri mai Kalitea, ka vakayacani koya mei Eparaama:

⁸ ka kunea na lomana ni sa dina vei iko, ka ia kaya na veiyalayalati, me solia na nodra vanua na kai Kenani, kei na Eci, kei na Amori, kei na lewe ni veikoro lalai, kei ira na Jepusa kei ira na Kerekesa, io mo solia ki na nona kawa, ia ko sa vakayacora na nomu vosa; ni ko sa yalododonu:

⁹ o a kunea talega na nodra rarawa na neimami qase mai Ijipita, ka rogoca na nodra tagi mai na Wasa Damudamu;

¹⁰ ka vakatakila nai vakatakilakila kei na cakacaka mana vei Fero, kei ira kecega na nona tamata, kei ira kecega na lewe ni nona vanua: ni ko a kila ni ra ia nai valavala viavialevu vei ira. O a vakarogotaka kina na yacamu, me vaka e na siga o qo.

¹¹ Ia ko a wasea na wasawasa e matadra, a ra sa lako kina e loma ni wasawasa e na qele mamaca; ia ko ira era vakasavi ira, ko a biuta ki loma ni wasa titobu, me vaka na vatu ki na wai kaukauwa.

¹² O a tuberi ira talega e na siga e na duru o; kei na bogi e na duru buka waqa, me vakararamataki ira e na sala me ra lako kina.

¹³ O a lako sobu talega ki na dela ni ulu-ni-vanua ko Sinei, ka vosa mai lomalagi vei ira, ka solia vei ira na lewa dodonu, kei na veivunau dina, na ka e lesi me kitaki, kei nai vakaro e vinaka:

¹⁴ ka vakatakila vei ira na nomu siga tabu ni vakacecegu, a sa vunautaka vei ira na veivakaro, kei na veilesilesi, kei na veivunau, e na gusu i Mosese na nomui talatala:

¹⁵ ka solia vei ira na madrai mai lomalagi ni ra viakana, ka vakadavea na medra wai mai na vatu ni ra viagunu, ka yalata vei ira me ra lako ka taukena na vanua ko a vosavavakini kina me solia vei ira.

¹⁶ Ia era a valavala vakaviavialevu ga, ko ira kei ira na neimami qase, ka ra sa domoqa, ka tawa vakarorogo ki na nomu veivunau,

¹⁷ ka sa bese ni talairawarawa, ka sega ni nanuma na nomu cakacaka mana ko a kitaka o na kedra maliwa; a ra sa vakadomoqataki ira ga, ka lesia e dua na turaga e na nodra talaidredre, ka me ra lesu kina me ra bobula: ia ko iko na Kalou sa dauviabokoca na ca, ka dauloloma ka yalovinaka, sa dauberabera ni cudru, ka levu na nomu yalololoma, ka sega kina ni biuti ira:

¹⁸ io, ni ra sa cakava oti e dua na luve ni karavau kaukamea sa vakawaicalataki, ka kaya, O qo na nomu Kalou ka kauti iko cake mai Ijipita; ka ra sa cakava oti na ka e veivakacudrui sara;

¹⁹ ia ko a sega ni biuti ira e na lekutu e na nomu loloma levu; na duru o sa sega ni lako tani vei ira e na siga, mo kauti ira e na sala; se na duru buka waqa e na bogi, me vakararamataki ira, kei na sala me ra lako kina.

²⁰ O a solia talega vei ira na nomu Yalo vinaka me vakatavulici ira, ka sega ni bureitaka na nomu mana ki na gusudra, ka solia na medra wai ni ra sa viagunu.

²¹ Io, e vasagavulu na yabaki ko a vakani ira e na lekutu, era sa sega kina ni dravudravua e na ka e dua; a sa sega ni madra mai na nodrai sulu, a sa sega ni vuce na yavadra.

²² O sa solia talega vei ira na matanitu e so kei na vanua e so, ka wasei ira vakatikitiki: era sa taukena kina na vanua ko Sioni, kei na nona vanua na tui Esiponi, kei na vanua nei Oki na tui Pasani.

²³ A luvedra talega ko a vakavuqataka ni e tautauvata kei na kalokalo kei lomalagi, ka kauti ira ki na vanua, a ya ko a yalataka me solia ki na nodra qase, me ra curu kina ka taukena.

²⁴ A sa curu kina na luvedra ka taukena na vanua, ia ko a vakamalumalumutaka e matadra na lewe ni vanua, na kai Kenani, ka soli ira ki na ligadra, kei ira na nodra tui kei ira na lewe ni vanua, me ra veitaliataki ira.

²⁵ A ra sa kabata na veikoro kaukauwa, ka taukena na vanua bula, kei na veivale sa oso kina na yau kecega, na veikeli-wai, na veivainivaini, kei na veiolive, kei na kau vua sa vuqa: a ra sa kana, ka sa mamau, ka uro, ka marautaki ira e na nomu loloma levu.

²⁶ Ia ka ra sa talaidredre, ka beci iko, ka biuta ki dakudra na nomu vunau, ka vakamatei ira na nomu parofita era vunauci ira me saumaki ira mai vei iko, a ra sa kitaka na ka e veivakacudrui vakalevu.

²⁷ O koya ko a soli ira kina ki na ligadra na nodra meca; a ra sa vakararawataki ira: ia e na gauna ni nodra rarawa, ni ra sa tagi vei iko, ko a rogoca mai lomalagi; ka sa solia vei ira nai vakabula e so, o ira era sa vakabulai ira mai na nodra meca, me vaka na nomu loloma levu.

²⁸ Ia ni ra sa vakacegu oti, era sa caka ca tale e matamu: o koya ko a laivi ira kina ki na liga ni nodra meca, a ra sa veitalia kina vei ira: ia ni ra sa saumaki mai, ka tagi vei iko, ko a rogoca mai lomalagi; ia ko a vakabulai ira vakavuqa, me vaka na nomu loloma;

²⁹ ka vunauci ira, mo saumaki ira tale mai kina ki na nomu vunau: a ra sa valavala vakaviavialevu ga, ka sega ni vakarorogo ki na nomu vunau, ka ra caka cala ga ki na nomu lewa, (a ya ena bula kina na tamata kevaka sa cakava;) ka vakasuka na tabadra, ka vakadomoqataki ira, ka sega ni vakarorogo.

³⁰ Ia ka sa vuqa na yabaki ko a vosoti ira, ka vunauci ira e na Yalomu e na gusudra na nomu parofita: ia era sa bese ga ni rogoca: o koya ko a soli ira kina ki na ligadra na lewe ni veivanua.

³¹ Ia e na vuku ni nomu loloma levu, ko a sega ni vakarusai ira sara, se biuti ira, ni ko sa Kalou yalovinaka ka dauloloma.

³² Ia o qo, ko iko na neimami Kalou, na Kalou levu, ka kaukauwa, ka rerevaki, sa vakabauta na vosa ni yalayala kei na loloma, me kakua ni ka lailai e matamu na rarawa kecega sa yacovi keimami, kei ira na neimami tui, kei ira na neimami turaga, kei ira na neimami bete, kei ira na neimami parofita, kei ira na neimami qase, kei ira kecega na nomu tamata, mai na nodra gauna na tui Asiria ka yacova na siga o qo.

³³ Ia ko iko, ko sa dodonu e na ka kecega sa yacovi keimami; ni ko sa caka dodonu, a sa caka ca ga koi keimami:

³⁴ a sa sega ni vakabauta na nomu vunau ko ira na neimami tui, kei ira na neimami turaga, kei ira na neimami bete, kei ira na neimami qase, se vakarorogo ki na nomu veivakaro kei na nomu veilesilesi, o qori ko a tukuna kina na nodra ca.

³⁵ Ni ra sa sega ni qaravi iko e na nodra matanitu, kei na nomu loloma levu ko a solia vei ira, kei na vanua levu ka bula ko a solia e matadra; era sa sega talega ni lesu mai na nodrai valavala ca.

³⁶ Raica, keimami sa qali e na siga o qo, ia na vanua ko a solia vei ira na neimami qase, me ra kania na vuana kei na kena vinaka, raica, keimami sa bobula kina:

³⁷ a sa vua vakalevu vei ira na tui ko sa lesia me veitalia vei keimami, e na vuku ni neimami valavala ca: era sa veitaliataka talega na yago i keimami, kei na neimami manumanu, me vaka na lomadra, ia keimami sa vakararawataki vakalevu.

³⁸ Ia e na vuku ni ka kecega o qo, keimami sa ia na veiyalayalati dina, ka vola; a ra sa dregata ko ira na neimami turaga, kei ira na neimami Levi, kei ira na neimami bete.