Niemaia 8 - AI VOLA TABU

Sa wilika ko Esira nai vola ni vunau vei ira kece na tamata, 1-12. Sa ia ua solevu ni vale taba ni kau, 13-18.

¹ A SA soqoni vata ko ira na tamata kecega, me vaka sa tamata lewe dua ga ko ira, ki na salatu sa donuya na matamata-ni-koro ni wai; a ra sa vosa vei Esira na vu-ni-vola, me kauta mai nai vola ni vunau i Mosese, a ya ka rotaka ko Jiova vei ira na Isireli.

² A sa kauta na vunau ko Esira na bete ki na matadra nai vavakoso, ko ira na tagane kei ira na alewa, kei ira kecega era sa rogoca rawa me kila, e nai matai ni siga e nai kavitu ni vula.

³ A sa wiliwili kina ko koya e na mata ni salatu sa donuya na matamata-ni-koro ni wai, mai na mataka ka yacova na siga levu, e na matadra na tagane kei ira na alewa, kei ira era kila rawa; a ra sa vakatu daligadra na tamata kecega ki nai vola ni vunau.

⁴ A sa tu ko Esira na vu-ni-vola e nai tutu kau, a ya era sa cakava kina; a sa tu voleka vua ko Maticiya, kei Sema, kei Anaya, kei Uriya, kei Ilikiya, kei Meeseya, e na ligana i matau; ia ki na nona i mawi, ko Pitaya, kei Misaeli, kei Malikiya, kei Asumi, kei Asipatani, ko Sikariya, ko Misulami.

⁵ A sa cega nai vola ko Esira e na matadra na tamata kecega; (ni sa cecere cake ko koya vei ira na tamata kecega;) ia ni sa cega, era sa tu cake na tamata kecega:

⁶ a sa vakarokorokotaki Jiova na Kalou levu ko Esira. A ra sa kaya, Emeni, emeni, ko ira na tamata kecega, ka laveta cake na ligadra: a ra sa vakacuva na uludra, ka soro vei Jiova ni sa vakanamata ki na qele.

⁷ Ia ko Josua, kei Pani, kei Serepiya, ko Yamini, ko Akupi, ko Sapicei, ko Otiya, ko Meeseya, ko Kilita, ko Asariya, ko Yosapati, ko Anani, ko Pilaya, kei ira na Levi, era vakamacalataka na vunau vei ira na tamata: a ra sa tu na tamata e nodra tikina.

⁸ A ra sa wilika vakamalua nai vola ni vunau ni Kalou, ka vakatakila na kenai balebale, ka vakamacalataka na ka sa wili.

⁹ Ia ko Niemiya o koya sa turaga, kei Esira na bete, na vu-ni-vola, kei ira na Levi, era sa vakavulici ira na tamata, era sa kaya vei ira kecega na tamata, A siga o qo sa tabu me nei Jiova na nomudou Kalou; dou kakua ni loma bibi, se tagi. Ni sa tagi ko ira kecega na tamata, ni ra sa rogoca na vosa ni vunau.

¹⁰ Sa qai kaya vei ira ko koya, Dou lako, dou kania na kena uro, ka gunuva na kena kamikamica, ka vakauta nai votavota vei ira sa sega na ka sa cokonaki kina: ni sa tabu na siga o qo me nona na noda Turaga: ia me kakua ni bibi na lomamudou; ni sa vu ni nomudou kaukauwa me marautaki Jiova.

¹¹ A ra sa tarovi ira na tamata kecega ko ira na Levi, ni ra kaya, Dou tiko lo, ni sa tabu na siga o qo; dou kakua talega ni loma rarawa.

¹² A sa lako yani ko ira kecega na tamata me kana, ka gunu, ka me vakauta nai votavota, ka me reki vakalevu, e na vuku ni ra sa kila na vosa sa tukuni vei ira.

¹³ Ia e na kenai karua ni siga, sa soqoni vata ko ira na nodra turaga qase na tamata kecega, kei ira na bete, kei ira na Levi, kivei Esira na vu-ni-vola, ka me kila na vosa ni vunau.

¹⁴ A ra sa kunea ni sa volai e na vunau ka vakarota ko Jiova e na gusu i Mosese, me ra tiko e na veivale taba ni kau ko ira na luve i Isireli, e na solevu sa dauia e nai kavitu ni vula:

¹⁵ a me ra tukuna yani ka vakarogotaka e na nodra veikoro kecega, kei Jerusalemi, ka vaka, Dou lako yani ki na ulu-ni-vanua, ka kauta mai na veitaba ni olive, kei na veitaba ni paini, kei na veitaba ni muriteli, kei na veitaba ni balabala, kei na veitaba ni kau vavaku, me caka kina na veivale taba ni kau, me vaka sa volai.

¹⁶ A sa lako yani ko ira na tamata, ka kauta mai, ka kitaka na nodra veivale taba ni kau, na tamata yadua e na dela ni nona vale, e na nodra veilomanibai talega, kei na veilomanibai ni vale ni Kalou, kei na sala mai na matamata-ni-koro ni wai, kei na sala mai na matamata-ni-koro i Ifireimi.

¹⁷ Ia ko ira nai vavakoso taucoko era sa tale mai na tiko vakabobula, era sa caka na veivale taba ni kau, ka tiko e na ruku ni veivale taba ni kau: ia ni ra sa sega ni kitaka vakakina ko ira na luve i Isireli mai na gauna i Josua na luve i Nuni. A sa dua na rereki levu sara.

¹⁸ Ia e na veisiga, mai nai matai ni siga ka yacova na siga emuri, sa wilika tiko ko koya nai vola ni vunau ni Kalou. A ra sa kitaka tiko na solevu ka bogi vitu, ia e nai kawalu ni siga, sa dua nai soqosoqo tabu, me vaka na kenai valavala.