NA SAME 98 - AI VOLA TABU

Sa vakarota vei ira na kai vuravura kecega me ia na vakavinavinaka vua na Kalou.

¹ DOU meketaka vei Jiova na meke vou, ni sa cakava oti na ka mana: a ligana i matau, kei na ligana daucaka dodonu, ka rawa kina na veivakabulai.

² Sa vakatakila ko Jiova ni sa dauia na veivakabulai ko koya: sa vakaraitaka votu na nona caka dodonu e na matadra na veimataqali.

³ Sa nanuma na nona yalololoma kei na nona lomadina ki na mataqali i Isireli: sa kunea nai yalayala kecega kei vuravura ni sa dauia na veivakabulai na noda Kalou.

⁴ Dou ia na meke vei Jiova, na vuravura kecega: dou lagata sara, dou kaila e na reki, dou ia na qiriqiri.

⁵ Dou sere vei Jiova e na api; e na api kei na domo ni meke.

⁶ E na davui kei na domo ni kaukamea dou ia na meke e na mata i Jiova, na Tui.

⁷ Me vadugu na Wasawasa, kei na ka e sinai kina; ko vuravura, kei ira era tiko kina.

⁸ Me cobo na uciwai: me reki vata na veiulu-ni-vanua

⁹ e na mata i Jiova; ni sa lako mai me lewai vuravura: ena lewai vuravura e na yalododonu, kei ira na tamata e na lewa dodonu.