NA SAME 96 - AI VOLA TABU

Sa vakarota na vakavinavinaka vua na Kalou, o koya me da doka.

¹ DOU meketaka vei Jiova na meke vou: dou meke vei Jiova, na vuravura kecega.

² Dou meke vei Jiova, dou vakavinavinaka ki na yacana; dou tukuna voli e na veisiga kece ni sa dauia na veivakabulai ko koya.

³ Dou tukuna na nonai ukuuku e na veimatanitu, na nona ka mana vei ira na veimataqali kecega.

⁴ Ni sa levu ko Jiova, ka sa dodonu me vakavinavinakataki vakalevu: me rerevaki vakalevu talega ka vakalailai na kalou kecega.

⁵ Ni sa matakau walega na nodra kalou na veimatanitu: ia ko Jiova ga sa cakava na lomalagi.

⁶ A vakarokoroko kei na ka vakaturaga sa tiko e matana: a kaukauwa kei nai ukuuku sa tiko e nona vale tabu.

⁷ Dou solia vei Jiova, koi kemuni na veimataqali tamata, dou solia vei Jiova na vakarokoroko kei na kaukauwa.

⁸ Dou solia vei Jiova na vakarokoroko ni yacana: dou kauta nai madrali ka curu ki na nona lomanibai.

⁹ Dou soro vei Jiova e nai ukuuku ni yalosavasava: dou rere e matana, na vuravura kecega.

¹⁰ Dou kaya e na veimatanitu, Sa lewa ko Jiova: ena vakataudeitaki talega ko vuravura me tawa yavala rawa: ena lewai ira vakadodonu na veimataqali.

¹¹ Me reki ko lomalagi, ka ladelade ko vuravura; me vadugu na wasawasa, kei na ka kecega sa sinai kina.

¹² Me rereki na veiwere, kei na ka kecega sa tiko kina, ena qai marau na kau kecega mai na veikau

¹³ e na mata i Jiova; ni sa lako mai ko koya, ni sa lako mai me lewai vuravura: ena lewai vuravura e na yalododonu, kei na veimatanitu e nona lomadina.