NA SAME 9 - AI VOLA TABU

A vakavinavinaka kei na vakabauta ni tamata yalododonu sa tiko vakararawa.

Vua na Domo-ni-meke e na Muce-lapeni. A Meke i Tevita.

¹ AU na vakavinavinaka vei Jiova e na yaloqu kecega; au na tukuna kecega na nomu cakacaka e veivakidacalataki.

² Au na reki ka marautaki iko: au na meketaka na yacamu, o iko sa Cecere.

³ Ni ra sa lesu kimuri na noqu meca, era na bale ka rusa mai na matamu.

⁴ Ni ko sa kitaka e na vukuqu na ka dodonu kei na lewa; o sa tiko e nai tikotiko vakaturaga, ka sa ia na lewa dodonu.

⁵ O sa vunauci ira na veimatanitu, o sa vakarusai koya na tamata ca; o sa quaraka laivi sara na yacadra ka tawa mudu.

⁶ O iko na meca, sa mudu sara na veivakarusai: o a vaqeavutaka na veikoro; sa takali vata kei ira na nodra vakananumi.

⁷ Ia ko Jiova, ena tu dei ga ka tawa mudu; sa vakarautaka ko koya na nonai tikotiko me ia na veilewai.

⁸ Ena lewa na vuravura ko koya e na lewa dodonu; ena lewai ira na lewe ni veivanua e na yalododonu sara.

⁹ Ena yaco ko Jiova me Uluvatu i koya sa vakararawataki, na uluvatu e na gauna ni veivakacacani.

¹⁰ Era na vakararavi talega vei iko ko ira era sa kila na yacamu, ni ko sa sega ni biuti ira era sa vakasaqarai iko, Jiova.

¹¹ Dou meke vei Jiova, vei koya sa tiko mai Saioni: tukuna vei ira na tamata na nona cakacaka.

¹² Ni sa taroga ko koya nai sau ni dra, sa nanumi ira: sa sega ni guilecava na nodra tagi era sa yalomalumalumu.

¹³ Mo yalololoma mai vei au, Jiova; raica na ka rarawa sa yaco vei au maivei ira era sa cati au, o iko ko sa laveti au cake mai na matamata-ni-koro ni mate:

¹⁴ meʼu tukuna kina na ka kecega ko sa vakavinavinakataki kina e na matamata-ni-koro ni gonealewa ni Saioni: au na reki ni ko sa ia na veivakabulai.

¹⁵ Sa sikalutu na veimatanitu ki nai keli era cakava: e na lawa era sa vunia sa cori kina na yavadra.

¹⁶ Sa kilai ko Jiova e na lewa sa kitaka ko koya; sa coriti na tamata ca e na cakacaka ni ligana. Sela.

¹⁷ Ena lako ki eli ko ira na tamata ca, na lewe ni veivanua kecega era sa guilecava na Kalou.

¹⁸ Ni na sega ni guilecavi tikoga na tamata dravudravua: ena tawa rusa laivi na ka era namaka na tamata yalomalumalumu.

¹⁹ Tu cake, Jiova; me kakua ni gumatua na tamata: me ra lewai e matamu ko ira na veimatanitu.

²⁰ I Jiova, mo vakarerei ira; me ra kilai ira na lewe ni veivanua ni ra sa tamata wa-lega. Sela.