NA SAME 89 - AI VOLA TABU

Sa dina na Kalou ni sa yalayala, 1-4. Sa kaukauwa, 5-14. Sa nanuma na ka e yalataka, 15-37. A sa qai nanumi me dua tani beka mai, ni sa biuti ira, 38-52.

A Masikili i Ecani na Esirai.

¹ AU na tawa mudu ni meketaka na yalololoma i Jiova: au na vakatakila e na gusuqu na nomu yalodina ki nai tabatamata kecega.

² Niʼu a kaya, Ena tara cake na loloma me tawa mudu: o na vakataudeitaka na nomu vosa dina me vaka na lomalagi:

³ Au sa ia oti na veiyalayalati kei koya kaʼu a digitaka, au sa vosavavakini vei Tevita na noqu tamata,

⁴ au na vakataudeitaka me tawa mudu rawa na nomu kawa, au na tara cake na nomui tikotiko me yacova nai tabatamata kecega. Sela.

⁵ Ia na lomalagi ena vakavinavinaka e na vuku ni nomu ka mana, Jiova: kei ira nai vavakoso e na vuku ni nomu vosa dina.

⁶ Ni sai cei mai lomalagi me vakatauvatani kei Jiova? o cei vei ira na luve ni qaqa me tautauvata kei Jiova?

⁷ Sa ka rerevaki vakalevu na Kalou e na nodrai soqosoqo na yalododonu, me vakarokorokotaki talega vei ira kecega era sa tiko voliti koya.

⁸ I Jiova na Kalou ni lewe vuqa, o cei sa kaukauwa me vakataki iko, Jiova? se vaka na nomu yalodina sa vakavolivoliti iko?

⁹ O sa lewa na cudru ni wasawasa: ni sa tubu na kena biau, o sa vakamaravutaka.

¹⁰ O a vorolaki Reapi, me vaka e dua sa vuetaki; o a vakasevi ira na nomu meca e na ligamu kaukauwa.

¹¹ Sa nomu na lomalagi, sa nomu talega ko vuravura: o vuravura kei na ka e sinai kina, ko a tauyavutaka.

¹² Na tokalau kei na ceva ko a cakava: o Tapori kei Erimoni ena reki e na yacamu.

¹³ Sa vei iko na liga kaukauwa: sa kaukauwa na ligamu, sa cecere na ligamu i matau.

¹⁴ Ai tutu ni nomui tikotiko vakaturaga na yalododonu kei na lewa dodonu: ena liutaka na matamu na loloma kei na yalodina.

¹⁵ Sa kalougata na tamata era kila na rorogo vinaka: era na lako voli, Jiova, e na rarama ni matamu.

¹⁶ E na yacamu era na reki e na veisiga: era na laveti cake talega e na nomu cakacaka dodonu.

¹⁷ Ni ko sai ukuuku ni nodra kaukauwa: ena cecere talega na neimami kaukamea e na nomu yalovinaka.

¹⁸ Ni sa nei Jiova na nodai sasabai; a sa nei Koya na Yalosavasava nei Isireli na noda tui.

¹⁹ O a qai vosa e na raivotu vua na nomu parofita yalododonu, ka kaya, Au sa solia na kaukauwa vua sa qaqa; au sa laveta cake e dua sa digitaki maivei ira na tamata.

²⁰ Au a kunei Tevita na noqu tamata; au sa lumuti koya e na noqu waiwai tabu:

²¹ ena tiko dei kaya na ligaqu: a tabaqu talega ena vakaukauwataki koya.

²² Ena sega ni vaqaseni koya rawa na meca; ka sega ni vakamalumalumutaki koya rawa na luve ni valavala ca.

²³ Au na mokuti ira sobu e matana na nona meca, ka yaviti ira era cati koya.

²⁴ Ia ena tiko kaya na noqu yalodina kei na noqu loloma: ia e na vuku ni yacaqu ena cecere na nona kaukamea.

²⁵ Au na vakayacora talega na ligana ki na waitui, kei na ligana i matau ki na veiuciwai.

²⁶ Ena kacivaka vei au, ko koya, O iko na tamaqu, na noqu Kalou, kei na uluvatu sa vakabulai au.

²⁷ Au na lesi koya talega me noqu ulumatua, me cecere vei ira na tui kei vuravura.

²⁸ Au na vakabauta tiko na noqu loloma vua ka tawa mudu, ena tu dei talega kaya na noqu veiyalayalati.

²⁹ Au na vakataudeitaka me tawa mudu na nona kawa, ena vaka talega na gauna vakalomalagi na nonai tikotiko vakaturaga.

³⁰ Kevaka era biuta na noqu vunau na luvena, ka tawa muria na noqu lewa;

³¹ kevaka era vakacacana na ka kaʼu sa sautaka, ka sega ni vakabauta na noqui vakaro;

³² kaʼu na qai cudruva na nodra bese e nai titoko, kei na nodrai valavala ca e na kuita.

³³ Ia kaʼu na sega ni kauta laivi vua na noqu loloma, se lasutaka na noqu vosa dina.

³⁴ Au na sega ni vakacacana na noqu veiyalayalati, se vakatanitaka na vosa sa lako tani e na tebenigusuqu.

³⁵ Au sa vavakini vakadua e na noqu yalododonu meʼu kakua ni lasu vei Tevita.

³⁶ Ena tawa mudu rawa na nona kawa, ena vaka na siga e mataqu na nonai tikotiko vakaturaga.

³⁷ Ena vaka na vula ena vakataudeitaki me tawa mudu rawa, ka vaka nai vakatakilakila dina mai lomalagi. Sela.

³⁸ Ia ko sa biuta ka vakasisilataka, ko sa cudru vua ko a lumuta.

³⁹ O sa vakatawayagataka na nomu veiyalayalati kaya na nomu tamata: o sa cakava me ka wale na nonai sala vakaturaga ni ko sa biuta ki na soso.

⁴⁰ O sa basuraka kecega na nona bai; o sa vakarusa sara na nona bai ni valu kaukauwa.

⁴¹ Sa betiraki koya ko ira kece sa lako voli e na sala: sai rogo ca vei ira na tiko voleka vua.

⁴² O sa vakaukauwataka na ligadra i matau era sa vakararawataki koya; o sa vakamarautaki ira na nona meca kecega.

⁴³ O sa moica na bati ni nonai seleiwau, ka sega ni vukea me tu rawa e nai valu.

⁴⁴ O sa vakaotia na nonai ukuuku, ka biuta ki na soso na nonai tikotiko vakaturaga.

⁴⁵ O sa vakalekalekataka na gauna ni nona cauravou: o sa vakaisulutaka e na madua. Sela.

⁴⁶ A cava na kena dede, Jiova? ena tawa mudu beka na nomu vunitaki iko? ena waqa beka me vaka na buka na nomu cudru?

⁴⁷ Mo nanuma na lekaleka ni noqu bula: a cava ko a cakava kina na luve ni tamata kecega me ka walega?

⁴⁸ O cei na tamata ko ya me na bula tiko ka tawa kunea na mate? ena vakabulai koya li mai na liga ni bulubulu? Sela.

⁴⁹ Sa evei, Turaga, na nomu yalololoma eliu, o a vosavavakini kina vei Tevita e na nomu yalodina?

⁵⁰ Nanuma, Turaga, na kedrai rogo ca na nomu tamata; au sa colata e lomaqu na nodra vosa ca na veimatanitu kecega e vuqa;

⁵¹ a ya era sa vosa ca kina, Jiova, ko ira na nomu meca; a ya era sa vosacataka kina nai lakolako i koya ko a lumuta.

⁵² Me vakarokorokotaki ko Jiova ka tawa mudu. Emeni, Emeni.