NA SAME 83 - AI VOLA TABU

E na nona masu sa tukuna vua na Kalou na nodra vere na meca, 1-8; ka masuta na Kalou me cudruvi ira, 9-18.

A Sere se Meke i Asafi.

¹ MO kakua ni galu, na Kalou: mo kakua ni tiko lo, mo kakua ni tiko wale, na Kalou.

² Raica, era sa ue na nomu meca: a ra viavialevu era sa cati iko.

³ Era sa buki kedra vere na nomu tamata, ka bose vakaca e na vukudra na tamata ko sa vakaruruga.

⁴ Era sa kaya, Me da mai vakawabokotaki ira me ra kakua ni matanitu tiko; me kakua ni nanumi tale na yaca i Isireli.

⁵ Ni ra sa lomavata me bose vata: era sa lomavata me bukia na kemu vere:

⁶ na veivale i Itomi kei Isimeeli; kei Moapi kei ira na Akiri;

⁷ kei Kipali, kei Amoni, kei Amaleki; na kai Filisitia vata kei na kai Teiri;

⁸ sa buki vata talega kei ira ko Asiria: era sa vukea na luve i Loti. Sela.

⁹ Mo cakacaka vei ira me vaka vei ira na kai Mitiani; me vaka vei Sisira, kei Japini, mai na uciwai ko Kisoni:

¹⁰ era a rusa mai Enitori: a ra a yaco me vaka na de ni manumanu e dela ni vanua.

¹¹ Mo cakava na nodra turaga me ra vakai Orepi, kei Siepi: ia na nodra tui kecega me vakai Sepa kei Salimuna:

¹² o iratou ka kaya, Tou rawata me nodatou na veivale ni Kalou.

¹³ Noqu Kalou, mo cakavi ira me ra vaka na covulaca; me ra vaka na vu-ni-sila e na mata ni cagi.

¹⁴ Me vaka sa tavuna na veikau na buka, a sa vakacaudreva na veiulu-ni-vanua na yameyame ni buka;

¹⁵ mo vakacacani ira vakakina e na nomu cava, ka vakadomobulataki ira e na nomu cava levu.

¹⁶ Mo vakamaduataka vakalevu na matadra; me ra qarava kina na vacamu, Jiova.

¹⁷ Me ra vakamaduataki ka taqaya tikoga; ia me ra vakarogocataki, ka kawayali:

¹⁸ me kila ko ira na tamata ni sai iko, na yacamu ko JIOVA, sa Cecere sara duaduaga e vuravura kecega.