NA SAME 82 - AI VOLA TABU

Sa vunauci ira na dauveilewai.

A Meke i Asafi.

¹ SA tu na Kalou e na nodrai soqosoqo na kaukauwa; sa lewa e na kedra maliwa na kalou.

² A cava na kena dede ni dou na lewa vakatawadodonu tiko, ka goleva na tamatai valavala ca? Sela.

³ Dou lewai rau vakavinaka na malumalumu kei na luveniyali: dou kitaka na ka e dodonu vei rau na rarawa kei na dravudravua.

⁴ Dou Vakabula na malumalumu kei na dravudravua: dou vakabulai rau mai na ligadra nai valavala ca.

⁵ Era sa sega ni kila, ka sega ni vuku rawa; era lako voli e na butobuto: sa yavala kecega na yavu kei vuravura.

⁶ Au a kaya, Dou sa kalou; kei na luve i Koya sa Cecere sara koi kemudou kecega:

⁷ ia dou na mate ga me vaka na tamata, ka bale me vaka na turaga.

⁸ Mo tu cake, na Kalou, mo lewai vuravura: ni ko na taukena na veimatanitu kecega.