NA SAME 81 - AI VOLA TABU

Sa masuti ira na tamata me vakavinavinaka vei Jiova, 1-5. Sa vakaroti ira ko Jiova me ra talairawarawa, 6-16.

Vua na Domo-ni-meke e na Kitica. A Meke i Asafi.

¹ DOU meke vakadomoilevu vua na Kalou na noda kaukauwa: dou qoqolou e na reki vua na Kalou i Jekope.

² Lagata na meke, ka kauta mai na lali, kei na api domo vinaka kei nai qiriqiri.

³ Uvuca na davui e na vula vou, e na gauna sa loku, e na siga ni noda solevu.

⁴ Ni sa lesi na ka o qo vei ira na Isireli, na ka dodonu me ia vua na Kalou i Jekope.

⁵ A sa cakava na ka o qo mei vakaro vei ira na Josefa, ni sa lako tani voli mai na vanua ko Ijipita: na vanua kaʼu a rogoca maikina na vosa kaʼu a tawa kila.

⁶ Au a kauta tani na tabana mai na kaukau: kei na ligana sa lako tani mai na kuro.

⁷ O a tagi ni ko a rarawa, ia kaʼu a vakabulai iko; au a vosa vei iko mai na yasana vuni ni kurukuru: au a vakatovolei iko mai na wai mai Miripa. Sela.

⁸ Dou vakarorogo, na noqu tamata, kaʼu na tukutuku vei iko: na Isireli, kevaka ko na vakarorogo vei au;

⁹ ena sega na kalou tani me tiko kei iko; ia mo kakua ni cuva ki na kalou ni kai tani.

¹⁰ Oi au ko Jiova na nomu Kalou, sa kauti iko tani mai na vanua ko Ijipita: mo dalaga vakalevu na gusumu, ia kaʼu na vakasinaita.

¹¹ Ia na noqu tamata, era sa sega ni via rogoca na domoqu; ka sa sega ni vinakati au ko ira na Isireli.

¹² Ia kaʼu a biuti ira yani ki na garogaro ni yalodra: a ra sa muria na nodra lewa.

¹³ Ke sa vakarorogo vei au ko ira na noqu tamata, ka muria na noqu sala ko ira na Isireli:

¹⁴ kaʼu a qai vakamalumalumutaki ira vakasauri na nodra meca, ka vakalesuya na ligaqu me veivala kei ira era sa vakararawataki ira.

¹⁵ O ira sa cati Jiova, era a qai soro vua: ia na nodra gauna na noqu tamata, sa na qai sega ni oti rawa.

¹⁶ Ia sa na qai vakani ira ko koya e na witi vinaka sara: ka vakamamautaki iko e na oni mai na Uluvatu.