NA SAME 80 - AI VOLA TABU

Sa tukuna vua na Kalou ni sa ca na nona lewe ni soro e na vuku ni nodra meca, a sa masuti koya me vakabulai ira.

Vua na Domo-ni-meke e na Sosanimi-ituca. A Meke i Asafi.

¹ MO vaqara daligamu mai, na nodrai vakatawa na Isireli, o iko ko a tuberi ira na Josefa me vaka na qele ni sipi; o iko sa tiko e na maliwa ni Jerupi, mo cila mai.

² E na mata i Ifireimi kei Penijamini kei Manase mo vakayadrata na nomu kaukauwa, ka mai vakabulai keimami.

³ Mo vakalesui keimami tale, na Kalou, me cilavi keimami na matamu; ia keimami na bula kina.

⁴ I Jiova, na Kalou ni lewe vuqa, a cava na kena dede ni ko na cudruva tiko na nodra masu na nomu tamata?

⁵ O sa vakani ira e na madrai wai-ni-mata; ka vagunuvi ira vakalevu e na wai ni matadra.

⁶ O sa cakavi keimami me ka e dauveiletitaki vei ira era voleka vei keimami: a ra sa dredre vakai ira na neimami meca.

⁷ Na Kalou ni lewe vuqa, mo vakalesui keimami tale, me cilavi keimami na matamu; ia keimami na bula kina.

⁸ O a kauta mai e dua na vaini mai Ijipita: o sa biuta tani na veimatanitu, ka tea.

⁹ O a vakarautaka na kena vanua, o a cakava me ti sobu na wakana, a sa robota na vanua.

¹⁰ Sa rugua na veiulu-ni-vanua e na yaloyalona, kei na sitari lelevu e na tabana.

¹¹ Sa teteva na waitui na tabana lelevu, kei na uciwai na tabana lalai.

¹² A cava ko sa qai basuka kina na kena bai, a ra sa covi koya kina ko ira kecega era sa lako voli e na sala?

¹³ Sa vakacacana na vuaka mai na veikau, a sa kania na manumanu kila ni vanua.

¹⁴ Na Kalou ni lewe vuqa, mo lesu mada mai: mo rai sobu mai lomalagi, ka raica, ka taleva na vaini o qo;

¹⁵ ka vakaruruga na ka e sa tea na ligamu i matau, kei na luvemu ko a vakaukauwataka me nomu.

¹⁶ Sa visa e na buka, sa ta sobu: era sa rusa ni sa vunauca na matamu.

¹⁷ Ia na ligamu, me tu vua na tamata ko ligamu i matau, vei koya na luve ni tamata ko sa vakaukauwataka me nomu.

¹⁸ Keimami na qai sega kina ni lesu tani vei iko: mo vakabulai keimami, keimami na masuta kina na yacamu.

¹⁹ I Jiova na Kalou ni lewe vuqa, mo vakalesui keimami tale, me cilavi keimami na matamu; ia keimami na bula kina.