NA SAME 78 - AI VOLA TABU

Sa kaya ni na tukuna na cakacaka ni Kalou, 1-8. A nodrai valavala na luve i Isireli ni ra tiko mai lekutu, kei na cakacaka mana ni Kalou vei ira, 9-55. Ni ra tiko talega mai Kenani, ka yacova na gauna i Tevita, 56-72.

A Masikili i Asafi.

¹ DOU vaqara daligamudou, noqu tamata, ki na noqu vunau: dou vakalakala daligamudou ki na vosa ni gusuqu.

² Au na dalaga na gusuqu e na vosa vakatautauvata: au na tukuna e so na ka sa vuni tu mai na gauna makawa:

³ a ya keitou sa rogoca ka kila, a ra sa tukuna mai vei keitou ko ira na noda qase.

⁴ Keitou na sega ni vunia vei ira na luvedra, keitou na vakatakila ki nai tabatamata emuri na kena vinaka ko Jiova, kei na nona kaukauwa, kei na nona cakacaka mana sa kitaka ko koya.

⁵ Ni sa lesia ko koya nai vakaro vei ira na Jekope, ka tauca na vunau vei ira na Isireli, a sa vakarota vei ira na noda qase, me ra vakatakila vei ira na luvedra:

⁶ me kila rawa nai tabatamata emuri, io ko ira na gone era na sucu maimuri; me ra tubu talega ka tukuna ki na luvedra:

⁷ ka me ra vakararavi ga vei koya na Kalou, ka tawa guilecava na cakacaka ni Kalou, ka vakabauta ga na nona vunau:

⁸ ia me ra kakua ni vakai ira na nodra qase, nai tabatamata yalovakatani ka talaidredre; nai tabatamata sa sega ni vakarautaka na lomadra, a sa sega ni dina vua na Kalou na yalodra.

⁹ Na luve i Ifireimi, sa vakaiyaragi e na dakai, era sa saumaki e na siga ni veivala.

¹⁰ Era sega ni vakabauta na veiyalayalati kei na Kalou, ka bese ni muria na nona vunau;

¹¹ a ra sa guilecava na nona cakacaka, kei na nona ka vakurabui sa vakatakila oti ko koya vei ira.

¹² A ka vakurabui sa kitaka ko koya e matadra na nodra qase, e na vanua ko Ijipita, kei na tiki ni vanua mai Soani.

¹³ Sa tawasea na wasawasa, ka kauti ira kina; ka cakava na wai me tu me vaka nai tuva tu va.

¹⁴ Sa tuberi ira e na siga e na o, kei na bogi e na rarama ni buka waqa.

¹⁵ Sa tasea na veivatu mai na veikau, ka vagunuvi ira me vaka mai na wai titobu sara.

¹⁶ Sa vakatubura talega na wai drodro mai na vatu, ka vakadavea sobu na wai me vaka na uciwai.

¹⁷ A ra sai valavala ca tale vua, ni ra vakacudrui Koya na Cecere mai na veikau.

¹⁸ A ra sa dauveretaki koya na Kalou e lomadra, ni ra kerea na kakana ni ra garova.

¹⁹ A ra sa vosacataka na Kalou; ka kaya, Sa cokonaka rawa li na Kalou nai kanakana e na veikau?

²⁰ Baica, sa yavita na vatu ko koya, a sa vure maikina na wai, a sa vuabale na dreke ni wai; sa solia rawa tale beka na madrai? sa vakarautaka rawa beka na lewe ni manumanu vei ira na nona tamata?

²¹ A sa rogoca na ka o qo ko Jiova, a sa cudru: a sa waqa kina na buka vei ira na Jekope, a sa tubu talega na cudru vei ira na Isireli;

²² e na vuku ni ra sa sega ni vakabauta na Kalou, ka sega ni vakararavi vua me vakabulai ira:

²³ ia ka sa rotaka oti na o maicake, ka dolava na katuba kei lomalagi,

²⁴ a sa vakatauca na mana vei ira me ra kania, a sa solia vei ira na sila kei lomalagi.

²⁵ Ia na tamata, sa kania na kedra na agilose: sa solia vei ira nai vaqa me ra mamau sara.

²⁶ Sa vakaliwara na tokalau mai lomalagi: a sa kauta mai na ceva e nona kaukauwa.

²⁷ A sa vakatauca vei ira na lewe ni manumanu me vaka na kuvu-ni-soso, kei na manumanu vakatabana me vaka na nuku mai na matasawa:

²⁸ a sa tauca e nai saqata ni nodrai tikotiko vakaivalu, ka vakavolivolita na nodra veivale.

²⁹ A ra sa kania, ka mamau sara: ni sa solia ko koya na ka era garova.

³⁰ Ia ka sa sega ni mudu rawa na nodra gagaro: ia ni sa tu ga e gusudra na kedra kakana,

³¹ sa yacovi ira na cudru ni Kalou, ka vakamatei ira era sa uro vei ira, ka mokuta na tamata bula nei Isireli.

³² Ia sa oti kecega o qo, ka rai valavala ca tikoga, ka sega ni vakabauta e na vuku ni nona cakacaka mana.

³³ O koya o qo sa vakaotia kina na nodra siga e na ka tawa yaga, kei na nodra yabaki e na ka rarawa.

³⁴ Ni sa mokuti ira, era sa qai qarai koya: ka lesu mai ka souta me taroga na Kalou.

³⁵ A ra sa nanuma ni sa nodra kaukauwa na Kalou, kei na nodrai Vakabula na Kalou Cecere.

³⁶ Ia ka ra sa vosaveicavilaki vua e gusudra, ka lasu vua e na yamedra.

³⁷ Ni sa sega ni dodonu vua na yalodra, a ra sa sega ni tiko dei e na nona veiyalayalati.

³⁸ Ia ko koya, ni sa yalololoma, sa tawa cudruvaka na nodrai valavala ca, ka sega ni vakarusai ira: ia sa vakalesuya tani vakavuqa na nona cudru, ka sega ni laiva me waqawaqa sara na nona cudru.

³⁹ Ni sa nanuma era sa tamata ga; na cagi sa lako tani, ka sega ni lako tale mai.

⁴⁰ A ka tani na nodra talaidredre vua mai na veikau, ka vakararawataki koya mai lekutu!

⁴¹ Io, era sa lesu tale yani ka vakatovolei koya vakaca na Kalou, ka vosalevutaki Koya na Yalosavasava nei Isireli.

⁴² Era sa sega ni nanuma na ligana, se na siga sa vakabulai ira kina mai na meca.

⁴³ Ni sa kitaka nai vakadinadina mai Ijipita, kei na nona cakacaka veivakidacalataki e na tiki ni vanua mai Soani:

⁴⁴ a sa vukica na nodra uciwai me dra; kei na nodra soniwai, me ra kakua ni gunuva rawa.

⁴⁵ Sa tala vei ira na manumanu lalai e vuqa, a sa kani ira; kei na boto, a sa vakacacani ira.

⁴⁶ A sa solia talega na nodra vuata ki na nuve, kei na ka era oca kina ki na vodre.

⁴⁷ Sa vakamatea na nodra vaini e na uca-cevata, kei na nodra lolo e na liliwa levu.

⁴⁸ Sa solia na nodra manumanu lelevu ki na uca-cevata, kei na nodra manumanu lalai ki na livaliva.

⁴⁹ Sa vakayacora vei ira na nona cudru waqawaqa, na lesavi, kei na yaluma, kei na ka rarawa, ni sa tala na agilose ca vei ira.

⁵⁰ Sa carata na sala ki na nona cudru; sa sega ni tarova na yalodra me kakua ni mate, a sa solia na nodra bula ki na mate vei vei tauvi;

⁵¹ a sa yavita na ulumatua kecega mai Ijipita; a nodra kaukauwa levu mai na veivale i Ami:

⁵² a sa kauti ira tani na nona tamata me vaka na sipi, ka tuberi ira voli e na veikau me vaka na qele ni sipi.

⁵³ A sa tuberi ira vakavinaka yani, a ra sa sega kina ni rere: ia ka sa dromuca na nodra meca na Wasawasa.

⁵⁴ A sa kauti ira ki nai yalayala ni nona vanua tabu, io ki na ulu-ni-vanua o qo, a ya sa, volia e na ligana i matau;

⁵⁵ a sa vakaseva tani e matadra na veimatanitu, a sa vota vei ira na nodra veiyasana e na dali, ka vakatikori ira na veimataqali i Isireli e na nodra veivale.

⁵⁶ Ia ka ra sa vakatovolea ka vakacudruya na Kalou Cecere, ka sega ni cakava na nona vunau:

⁵⁷ a ra sa lesu tani ga, ka cakacaka vakailasu me vaka na nodra qase: a ra sa vuki vakatani me vaka na dakai e daulasu.

⁵⁸ A ra sa vakacudrui koya e nodra veiyasana cecere, ka kitaki koya me vuvu e na vuku ni nodra matakau ceuceu.

⁵⁹ Sa rogoca na Kalou, a sa cudru sara, a sa vakasisilataki ira vakalevu na Isireli:

⁶⁰ a sa biuta kina na nonai tikotiko mai Silo, na nona vale sa lesia ko koya me tiko kei ira na tamata;

⁶¹ a sa soli ira na nona kaukauwa me ra vakabobulataki, kei na nonai ukuuku ki na ligana na meca.

⁶² A sa soli ira na nona tamata me mate e nai seleiwau; a sa cudruva na nonai votavota.

⁶³ Sa kania na nodra cauravou na buka; a sa sega ni musu na nodra gonealewa me vakawati.

⁶⁴ Sa bale na nodra bete e nai seleiwau; a sa sega ni tagi na nodra alewa dawai.

⁶⁵ A sa qai yadra mai na Turaga me vaka e dua mai na moce, ka vaka na tamata qaqa ni sa kaila e na vuku ni waini.

⁶⁶ A sa yavita nai murimuri ni nona meca: a sa cakavi ira me rai rogorogo ca tikoga.

⁶⁷ A sa bese ni tiko e na vale i Josefa, ka sega ni digitaka na mataqali i Ifireimi:

⁶⁸ a sa digitaka na mataqali i Juta, na ulu-ni-vanua ko Saioni, a ya ka lomana ko koya.

⁶⁹ A sa tara vakacecere na nona vale tabu, me vakataki vuravura, a ya sa tauyavutaki me tawa oti rawa.

⁷⁰ Sa digitaki Tevita talega na nona tamata, ka kauti koya mai na bai ni sipi:

⁷¹ ni sa muria tiko na sipi sa vakasucu, sa kauti koya me vakani ira na Jekope na nona tamata, kei ira na Isireli na nonai votavota.

⁷² A sa vakani ira me vaka na nona yalododonu; ka tuberi ira ni sa vuku na ligana.