NA SAME 76 - AI VOLA TABU

Sa vakatakila ni sa rerevaki na Kalou, e na ruku ni nona cakacaka e na vukudra na nona lewe ni soro.

Vua na Domo-ni-meke e na Nikinoca. A Meke se Sere i Asafi.

¹ SA kilai e Juta na Kalou: sa levu na yacana mai Isireli.

² Ia sa tu mai Selemi na nona vale, kei na nonai tikotiko mai Saioni.

³ Sa musuka maikina ko koya na gasau ni dakai, nai sasabai, kei nai seleiwau, kei nai valu. Sela.

⁴ O iko, ko sa rogo ka levu vakaidina, ka lailai na nodra veiulu-ni-vanua na dauivalavala vakaukauwa.

⁵ Sa kauti tani na nodrai toki ni valu na qaqa, era sa moce lutu: a sa sega vei ira na kaukauwa era sa kunea na ligadra.

⁶ Ni ko a vunauca, na Kalou i Jekope, sa moce lutu mai na veivale-vodoki, kei na ose.

⁷ O iko, io, sai iko ga, sa rerevaki: o cei sa tu rawa e matamu ni ko sa qai cudru?

⁸ O a vakarogotaka mai na nomu lewa mai lomalagi; sa rere ko vuravura, ka tiko lo,

⁹ ni sa tu cake na Kalou me lewa, me vakabulai ira kecega era vakararawataki e vuravura. Sela.

¹⁰ Ni na vakarokorokotaki iko na cudru ni tamata: ia na kena vo ni cudru ko na vakadaroya.

¹¹ Dou vosa vavakini, ka kitaka talega vei Jiova na nomudou Kalou: o ira kecega era tiko vakavolivoliti koya, me ra kauta mai na ka ni loloma vei koya sa rerevaki.

¹² Ena waicalataka ko koya na lomadra na turaga: sa rerevaki ko koya vei ira na tui kei vuravura.