NA SAME 74 - AI VOLA TABU

Sa tagi vua na Kalou ni sa ca na nona tamata, kei na nona vale tabu, e na vuku ni meca, 1-9. Sa masuta na Kalou me vakabulai ira, 10-23.

A Masikili i Asafi.

¹ A CAVA, na Kalou, ko sa biuti keimami laivi kina ka tawa mudu? a cava e kubou kina na nomu cudru vei ira na sipi ni nomu veico?

² Mo nanuma na nomu lewe ni soro ko a volia eliu; na mataqali ni nomu vanua, a ya ko a vakabula; na ulu-ni-vanua ko Saioni o qo, a ya ko a dautiko kina.

³ Me kusarawa mai na yavamu ki na veivakarusai sa tawa mudu; ki na ka kecega sa vakacacana na meca e nomu vale tabu.

⁴ Era sa qoqolou na nomu meca e na kedra maliwa na nomui soqosoqo; era sa vakaduria na nodrai vakatakilakila mei vakatakilakila.

⁵ Sa rogo eliu na tamata e na vuku ni sa laveta na matau me dauta kau lelevu.

⁶ Ia o qo, na kena ka sa ceuceu era sa qai basuka sobu vata e na matau kei nai tukituki.

⁷ Era sa vakama na nomu vale tabu e na buka, era sa vakacacana nai tikotiko ni yacamu ni ra sa talaraka ki na qele.

⁸ Era sa kaya e lomadra, Me da musuki ira vata: era sa vakama oti na nodra vale kecega nai soqosoqo ni Kalou e na vanua.

⁹ Keimami sa sega ni raica tiko na neimami vakatakilakila: sa sega tale e dua na parofita: a sa sega e dua vei keimami e kila se na vakaevei na kena dede.

¹⁰ A cava na kena dede, na Kalou, ni na vosa ca tiko na meca? ena tawa mudu beka ni na vosacataka tiko na yacamu na meca?

¹¹ A cava ko sa vakasuka tale kina na ligamu, io, na ligamu i matau? mo cavuta tale mai na lomaseremu.

¹² Ia na Kalou sa noqu Tui mailiu, e sa ia tiko na veivakabulai e vuravura.

¹³ O a wasea na wasawasa e nomu kaukauwa: o a bola na uludra na tavuto e loma ni wai.

¹⁴ O a bola na ulu i Livaiacani, ka soli koya me kedra kakana era tiko mai na veikau.

¹⁵ O a basia na mata-niwai kei na uciwai: o a vakadiva na uciwai kaukauwa.

¹⁶ Sa nomu na siga, a sa nomu talega na bogi: o a vakarautaka na rarama kei na mata-ni-siga.

¹⁷ 0 a lesia nai yalayala kecega kei vuravura: o a cakava na vula i katakata kei na vula i liliwa.

¹⁸ I Jiova, mo nanuma na ka o qo, ni sa vosavakacaca na meca, a ra sa beca na yacamu na mataqali lialia.

¹⁹ Kakua ni solia yani na yalona na nomu ruve ki na nodrai soqosoqo nai valavala ca: mo kakua ni guilecava tikoga nai soqosoqo ni nomu tamata dravudravua.

²⁰ Mo nanuma na vosa ni yalayala: ni sa sinai e na vale e dau veivakararawataki na veiyasana butobuto kei vuravura.

²¹ Me ra kakua ni lesu tale ka vakamaduataki ko ira era vakacacani: me ra dui vakavinavinaka ki na yacamu na rarawa kei na dravudravua.

²² Mo tu cake, na Kalou, mo veileti e na vukumu: mo nanuma ni sa vosavakacataki iko e na veisiga na tamata lialia.

²³ Mo kakua ni guilecava na domodra na nomu meca: sa lako cake tikoga na nodra ue era tu cake me veivala kei iko,