NA SAME 72 - AI VOLA TABU

Sa masulaki Solomoni ko Tevita, ka vakatakila na ka vinaka ena yaco e na nona lewa, 1-17. Sa vakavinavinaka kina, 18-20.

A Meke nei Solomoni.

¹ NA Kalou, mo solia vua na tui na nomu lewa dodonu, kei na nomu cakacaka dodonu vua na luvena na tui.

² Ena lewai ira vakadodonu na nomu tamata ko koya, kei ira na nomu kaisi e na lewa vinaka.

³ Ena tubura na kedra sautu na tamata na veiulu-ni-vanua, kei na veiulu-ni-koro, e na lewa dodonu.

⁴ Ena ia na veilewai ko koya e na vukudra na tamata era vakararawataki, ena vakabulai ira na luveniyali, ka musuki koya na dauivalavala kaukauwa.

⁵ Era na rerevaki iko ni sa tiko ga na siga kei na vula, io e nai tabatamata kecega.

⁶ Ena lako sobu mai ko koya me vaka na uca ki na buroro: me vaka na uca sa vakasuasuataka na qele.

⁷ Ena tubu e na nona gauna ko ira na yalododonu; kei na sautu levu, ka yacova na gauna e oti kina na vula.

⁸ Ena lewa talega mai na wasawasa e dua ka yacova na Wasawasa e dua, mai na uciwai levu talega, ka yacova nai yalayala kei vuravura.

⁹ Era na cuva e matana ko ira era tiko mai lekutu; era na dramica na kuvu-ni-soso ko ira na nona meca.

¹⁰ 0 ira na tui Tarisisi kei na tui ni veiyanuyanu, era na kauta mai nai madrali: o ira na tui Sepa kei na tui Sipa era na cabora na ka ni loloma.

¹¹ Ia ko ira kecega na tui, era na cuva e matana: era na qaravi koya na veimatanitu kecega.

¹² Ni toa vakabula ko koya na dravudravua ni sa tagi; kei koya sa vakararawataki ka sa sega e vukei koya.

¹³ Ena lomana ko koya na tamata malumalumu ka dravudravua, ka Vakabula na yalodra na dravudravua.

¹⁴ Ena Vakabula na yalodra mai nai lawaki kei nai valavala kaukauwa: ena ka talei talega e matana na kedra dra.

¹⁵ Ena bula talega ko koya, ena soli talega vua na koula mai Sepa: ena kitaki tiko talega na masu e na vukuna; ena vakavinavinakataki tiko talega e na veisiga.

¹⁶ Ena sa tu e vuravura e na dela ni veiulu-ni-vanua na sila e qumi rawarawa ga; ena kurekure na vuana me vakataki Lipanoni: era na tubu talega na lewe ni koro me vaka na co ni vanua.

¹⁷ Ena tawa oti rawa na yacana: ena tu na yacana ni sa tu na siga: a ra na vakalougatataki na tamata e na vukuna: era na vosaveivakalougatataki koya na lewe ni veivanua kecega.

¹⁸ Me vakavinavinakataki ko Jiova na Kalou, na Kalou nei Isireli, o koya sa cakava duaduaga na ka e veivakidacalataki.

¹⁹ Ia me vakavinavinakataki na yacana vakaiukuuku ka tawa mudu: ia me sinai talega ko vuravura kecega e na nonai ukuuku. Emeni, Emeni,

²⁰ Sa oti na masu i Tevita na luve i Jese.