NA SAME 71 - AI VOLA TABU

A masu ni tamata yalododonu vakararawataki.

¹ I JIOVA, au sa vakararavi vei iko: kakua ni laivi au meʼu madua e na gauna e dua.

² Mo vakabulai au e na nomu yalododonu, ka meʼu dro rawa: mo vakatu daligamu mai vei au, ka vakabulai au.

³ Mo noqu vale kaukauwa, meʼu dro tikoga kina: o sa vosa oti meʼu bula; ni ko sa noqu uluvatu kei na noqu koro kaukauwa.

⁴ Mo vakabulai au, na Kalou, mai na ligana na tamatai valavala ca, mai na ligana na tamata tawa dodonu kai valavala vakaukauwa.

⁵ Ni sai iko ga, Turaga Jiova, kaʼu sa goleva tiko: o iko ga kaʼu a vakararavi kina niʼu a cauia-vou ka yacova na gauna o qo.

⁶ O a tokoni au mai na siga kaʼu a sucu kina; o iko ga ka kauti au mai na kete i tinaqu: au na vakavinavinaka tikoga e na vukumu.

⁷ Au sa vaka na ka e dauveivakidacala-taki vei ira na lewe vuqa; ia ko iko ga na noqui drodro kaukauwa.

⁸ Me sinai na gusuqu e na vakavinavinaka vei iko, kei na vakacaucautaki iko e na siga ka Bogi.

⁹ Kakua ni biuti au e na gauna kaʼu sa qase mai kina; kakua ni laivi au ni sa oti na noqu kaukauwa.

¹⁰ Ni ra sa vosava-kacacani au na noqu meca; a ra sa bose vata ko ira era sa lawakitaka na yaloqu,

¹¹ ka kaya, Sa biuti koya na Kalou: dou vakasavi koya ka taura; ni sa sega e dua me vakabulai koya.

¹² Na Kalou, mo kakua ni vakayawa vei au: noqu Kalou, mo kusarawa ni vukei au.

¹³ Me ra vakamaduataki ka vakarusai era sa meca ni yaloqu; me ra vakarogocataki vakalevu ka tawa vakarokorokotaki ko ira sa qara na ka meʼu ca kina.

¹⁴ Ia koi au, kaʼu na namaka vinaka tikoga, ka vakavinavinaka vakalevu cake tiko vei iko.

¹⁵ A gusuqu, ena tukuna tikoga na nomu cakacaka dodonu kei na bula sa maivei iko; niʼu sa sega ni kila na kenai wiliwili.

¹⁶ Au na lako yani e na kaukauwa ni Turaga ko Jiova: au na vakananuma na nomu cakacaka dodonu, io, na nomu duaduaga.

¹⁷ O a vakavulici au, na Kalou, niʼu a gone: ka yacova na gauna o qo kaʼu sa tukuna tiko na nomu cakacaka veivakidacalataki.

¹⁸ O qo talega, ni kaʼu sa qase ka sika mai, mo kakua ni laivi au, na Kalou; ka meʼu vakatakila mada eliu na ligamu vei ira nai tabatamata o qo, kei na nomu kaukauwa vei ira kecega ena tubu mai emuri.

¹⁹ A nomu yalododonu talega, na Kalou, na ka cecere sara, o sa cakava oti na ka vakaidina: na Kalou, o cei sa vakai iko!

²⁰ O iko, ko sa vakatakila mai vei keimami na ka rarawa vakalevu ka ca sara, o na vakabulai keimami tale, ka kauti keimami cake tale mai na wai titobu e vuravura.

²¹ O na vakalevulevui au, ka vakacegui au e na veiyasana kecega.

²² Au na meketaki iko talega e nai qiriqiri, to na nomu yalodina, na noqu Kalou: au na sere vei iko e na api, o iko na Yalosavasava nei Isireli.

²³ Ena marau vakalevu na tebenigusuqu niʼu sa sere vei iko; kei na yaloqu, o koya ko sa vakabula.

²⁴ A yamequ talega, ena tukuna tikoga na nomu cakacaka dodonu e na siga kecega ka bogi: ni ra sa vakamaduataki, ni ra sa vakarogocataki era sa qara na ka meʼu ca kina.