NA SAME 7 - AI VOLA TABU

A masu me nonai to na Kalou.

A meke i Tevita ni sa vakasevi, a ya sa meketaka ko koya vei Jiova, e na vuku ni vosa i Kusa ua luve i Penijamini.

¹ I JIOVA noqu Kalou, au sa vakararavi vei iko; maroroi au maivei ira kecega era sa vakasavi au, ka vakabulai au:

² de dresulaka vakalaioni na yaloqu de dresulaka vakamatailalai, ka sega e dua nai vakabula.

³ Jiova noqu Kalou, kevaka kaʼu a kitaka na ka o qo; kevaka sa tu e na ligaqu na ca;

⁴ kevaka kaʼu a saumi koya e na ca keirau a tiko vinaka kaya; (io, kaʼu a vakabulai koya sa noqu meca walega:)

⁵ me qai vakasava na yaloqu na meca, ka vauca; io, me buturaka na noqu bula ki na soso, ka viritaka na noqu totoka ki na kuvu-ni-soso. Sela.

⁶ Tu cake, Jiova, e na nomu cudru, vakalevui iko cake e na vuku ni nodra cudru na noqu meca; mo yadra e na vukuqu me yaco na lewa ko a vosa kina.

⁷ Ena qai vakavolivoliti iko kina nai vavakoso lewe ni veivanua: e na vukudra ga mo lesu tale kina kicake.

⁸ Ena lewai ira na tamata ko Jiova: lewai au, Jiova, me vaka na noqu yalododonu, kei na noqu yalosavasava sara sa tu vei au.

⁹ Me oti laivi mada na nodra ca na tamata ca; ia mo vakataudeitaka na yalododonu: ni sa vakatovolea na yalo kei nai ivi ni tamata na Kalou yalododonu.

¹⁰ A noqui vakaruru na Kalou, o koya sa vakabulai ira era sa yalododonu.

¹¹ Sa lewai ira na tamata yalododonu na Kalou, a sa cudru na Kalou e na veisiga kecega vei ira na tamatai valavala ca.

¹² Kevaka sa sega ni saumaki mai, ena vagatara ko koya na nonai seleiwau; sa loqata oti na nona dakai, ka vakarautaka.

¹³ Sa vakarauta talega vua nai yaragi ni mate; ena kitaka na nona gasau me kedra na dauveivakasavi.

¹⁴ Raica, sa yaluma e na ka ca: a sa kunekunetaka na ka rarawa sara, a sa vakasucuma na lasu.

¹⁵ Sa kelia e dua nai keli ka vakagagataka, a sa qai lutu ki nai keli ka cakava.

¹⁶ Ena lesu ki na uluna na nona veivakararawataki, ia na nona dauveivakacacani ena lutuka na nona qavokavoka.

¹⁷ Au na vakavinavinaka vei Jiova me vaka na nona yalododonu; au na meketaka na vakamolimoli vei Jiova sa cecere sara.