NA SAME 69 - AI VOLA TABU

A masu sa ia e na gauna ni veivakacacani.

Vua na Domo-ni-meke e na Sosanimi. A Meke i Tevita.

¹ MO vakabulai au, na Kalou; ni sa mai luvuca na yaloqu na wai.

² Au sa lutudromu e na oruoru, sa sega kina na ka meʼu tu kina: au sa yaco ki na wai titobu, sa dromuci au kina na wai levu.

³ Au sa oca e na tagi: sa mamaca na noqui tilotilo: sa malumalumu na mataqu niʼu sa waraki koya tiko na noqu Kalou.

⁴ Era le vuqa era sa cati au walega ka lailai na drau ni uluqu: era kaukauwa ko ira sa via vakarusai au, ni ra noqu meca walega: au a qai vakasuka tale na ka kaʼu a sega ni kovea.

⁵ Na Kalou, ko sa kila na noqu lialia; a sa sega ni vuni vei iko na noqui valavala ca.

⁶ Turaga Jiova ni lewe vuqa, me ra kakua ni madua e na vukuqu ko ira era qaravi iko: na Kalou nei Isireli, me ra kakua ni vakamaduataki e na vukuqu era qarai iko.

⁷ Niʼu sa vosavakacacataki e na vukumu; sa ubia na mataqu na madua.

⁸ Au sa vaka na kai tani vei ira na taciqu, kei na vulagi vei ira na luve i tinaqu.

⁹ Ni sa kani au sara na loloma katakata ki na nomu vale: a sa lutuki au na nodra vosa ca era sa vosavakacacataki iko.

¹⁰ Niʼu a tagicaka na yaloqu niʼu a lolo, kaʼu a vosavakacacataki kina.

¹¹ Au a vakaisulutaki au talega e nai sulu taqarotu; ia kaʼu a vakaibole kina vei ira.

¹² Era dauvosavakacacataki au ko ira na dautiko e na matamata-ni-koro; a ra sa serekalitaki au ko ira na daumateni.

¹³ Ia koi au, Jiova, au sa masu vei iko e na gauna ni vinakati: mo rogoci au, na Kalou, e na kena levu ni nomu loloma, ni ko sa daudina ni ia na veivakabulai.

¹⁴ Mo vueti au mai na oruoru, meʼu kakua ni dromu; meʼu vakabulai maivei ira era sa cati au, mai na wai titobu talega.

¹⁵ Me kakua ni luvuci au na wai levu, a me kakua ni tilomi au na wai titobu, me kakua talega ni sogoti mai vei au na gusu ni bulubulu.

¹⁶ Mo rogoci au, Jiova; ni sa ka vinaka na nomu loloma: mo golevi au mai me vaka na kena levu ni nomu yalololoma.

¹⁷ Ia mo kakua ni vunia na matamu vua na nomu tamata; niʼu sa vakararawataki: mo rogoci au kusarawa.

¹⁸ Mo toro voleka mai ki na yaloqu, ka sereka: vakabulai au e na vukudra na noqu meca.

¹⁹ O sa kila na ka kaʼu sa vosacataki kina, kei na ka kaʼu sa vakamaduataki kina, kei na ka kaʼu sa vakarogocataki kina: era tiko kecega e matamu na noqu meca.

²⁰ Sa vakamavoataka na lomaqu na vosa ca; au sa bibi sara: ia kaʼu sa rai voli me lomani au e dua, ka segai; me so talega me vakalecataki au, ka sega kaʼu kunea.

²¹ Era sa solia talega na ka gaga me qau kakana; kei na wai wiwi meʼu gunuva niʼu a viagunu.

²² Me yaco na nodrai kanakana e matadra mei cori: kei na nodra tiko vinaka, me tudai.

²³ Me vakabutobutotaki na matadra, me ra kakua ni rai rawa; ia mo vakatekiloloutaka tikoga na tolodra.

²⁴ Sovara vei ira na nomu cudru, ia me tauri ira na nomu cudru waqawaqa.

²⁵ Me lala didi mai na nodra vale; ia me kakua e dua me tiko e nodra vale malo.

²⁶ Ni ra sa vakacacani koya ko sa yavita; ka vosa-vakararawataki ira ko sa vuetaka.

²⁷ Mo cudruvaka na nodrai valavala tawa dodonu: me ra kakua talega ni vakadonui vei iko.

²⁸ Me ra bokoci mai nai vola ni bula, ia me ra kakua ni volai vata kei ira na yalododonu.

²⁹ Ia koi au kaʼu sa malumalumu ka rarawa: me laveti au kicake, na Kalou, na bula sa maivei iko.

³⁰ Au na vakavinavinaka ki na yaca ni Kalou e na meke, ka vakalevulevui koya e na vakamolimoli.

³¹ Ena vinaka na ka o qo vei Jiova, ka ca na karavau, se na karavau tagane sa vakau-kamea ka vaququna.

³² Era na kunea na ka o qo na yalomalumalumu, ka reki: ena bula talega na lomamudou sa qarai koya na Kalou.

³³ Ni sa rogoci ira na dravudravua ko Jiova, ka sega ni beci ira na nona vesuki.

³⁴ Me vakavinavinaka vua ko lomalagi kei vuravura, na wasawasa kei na ka kecega sa yavala kina.

³⁵ Ni na vakabulai Saioni na Kalou, ka tara na Veikoro i Juta: me ra tiko maikina, ka taukena.

³⁶ Era na taukena talega na nodra kawa na nona tamata: ka tiko maikina ko ira era sa lomana na yacana.