NA SAME 67 - AI VOLA TABU

A masumasu me yaco na lewa ni Kalou e vuravura.

Vua na Domo-ni-meke e na Nikinoca. A Sere se Meke.

¹ ME yalololoma mai na Kalou, vei keimami, ka vakalougatataki keimami; me cilavi keimami na matana. Sela.

² Me kilai kina na nomu sala e vuravura, kei na bula sa maivei iko ki na lewe ni veimatanitu kecega.

³ Me ra vakavinavinaka vei iko, na Kalou, ko ira na lewe ni veivanua; io, me ra vakavinavinaka vei iko na lewe ni veivanua kecega.

⁴ Me ra rereki na veivanua ka meke e na marau: ni ko na lewai ira vakadodonu na veimataqali, ka veitalia vei ira na veivanua e vuravura. Sela.

⁵ Me ra vakavinavinaka vei iko, na Kalou, ko ira na lewe ni veivanua; io, me ra vakavinavinaka vei iko na lewe ni veivanua kecega.

⁶ Ena qai vuataka na vuana ko vuravura; ena qai vakalougatataki keda na Kalou, io, na noda Kalou.

⁷ Ena vakalougatataki keda na Kalou; ena rerevaki koya talega nai yalayala kecega kei vuravura.