NA SAME 66 - AI VOLA TABU

Me ra vakavinavinaka ki na Kalou na lewe livi ni veivanua, ka cuva vua, ni sa veitaliataka na ka kecega ko koya, 1-7. A sa levu na nona loloma vei ira na nona tamata, 8-12; ka levu vei Tevita, 13-20.

Vua na Domo-ni-meke. A Sere se Meke.

¹ DOU meke vakadomoilevu vua na Kalou, na veivanua kecega:

² dou meketaka nai rogorogo vinaka ni yacana: dou vakaiukuukutaka na vakavinavinaka vua.

³ Dou kaya vua na Kalou, A kena rerevaki na nomu cakacaka! e na vuku ni nomu kaukauwa levu era na vakarokoroko vei iko na nomu meca.

⁴ Era na cuva vei iko na kai vuravura kecega, ka sere vei iko; era na serevaka na yacamu. Sela.

⁵ Dou mai raica na cakacaka ni Kalou: sa ka rerevaki na nona cakacaka vei ira na luve ni tamata.

⁶ Sa vukica na wasawasa me vanua mamaca: era a lakova na wai levu e na yavadra: e na yasana ko ya eda a rekitaki koya.

⁷ Sa lewa ko koya e nona kaukauwa ka tawa mudu; sa raica tiko na veimatanitu ko na matana: me ra kakua ni vakalevulevui ira na yalovakatani. Sela.

⁸ Dou vosavinakataka na noda Kalou, oi kemudou na veimataqali, ka vakarogorogotaka na domo ni vakavinavinaka vua:

⁹ o koya sa maroroya tikoga na noda bula, ka sega ni laiva na yavada me yavala.

¹⁰ Ni ko sa vakatovolei keimami, na Kalou: o sa vakatovolei keimami, me vaka ni sa vakatovolei na siliva.

¹¹ O a kauti keimami ki loma ni lawa; o a kotora nai colacola e daku i keimami.

¹² O a cakavi ira na tamata me ladeva na ulu i keimami, ni ra vodo e na ose; keimami a lako e na loma ni buka kei na loma ni wai: ia ko a kauti keimami ga ki na vanua vinaka.

¹³ Au na curuma na nomu vale kei nai soro kama; au na kitaka vei iko na ka kaʼu a vavakini kina,

¹⁴ a ya sa cavuta na tebenigusuqu, a sa vosataka na gusuqu, niʼu a vakararawataki.

¹⁵ Au na cabora vei iko mei soro kama na manumanu uro, kei na sipi tagane me ka boi vinaka; au na cabora na karavau kei na koti. Sela.

¹⁶ Dou toro mai mo dou rogoca, oi kemudou kecega sa rerevaka na Kalou, kaʼu na tukuna na ka sa cakava ko koya e na vuku ni yaloqu.

¹⁷ Au a tagi vua e na gusuqu, a sa vakalevulevui ko koya e na yamequ.

¹⁸ Kevaka kaʼu goleva e lomaqu nai valavala ca, ena sega ni rogoci au na Turaga:

¹⁹ ia ka sa rogoci au vakaidina na Kalou; sa vakarorogo ki na domo ni noqu masu.

²⁰ Me vakavinavinakataki na Kalou, ni sa sega ni biuta tani na noqu masu, se na nona loloma vei au.