NA SAME 6 - AI VOLA TABU

A masu ni sa vakararawataki.

Vua na Domo-ni-meke e na Nikinoca e na Seminica. A Meke i Tevita.

¹ I JIOVA, kakua ni cudruvi au e na nomu cudru, kakua ni yaviti au e na nomu cudru katakata.

² Mo yalololoma mai vei au, Jiova; niʼu sa malumalumu: vakabulai au, Jiova, ni sa rarawa na suiqu.

³ A yaloqu talega sa rarawa vakalevu; ia ko iko, Jiova, ena vakaevei na kena dede?

⁴ Lesu tale mai, Jiova, Vakabula na yaloqu: vakabulai au e na vuku ni nomu loloma.

⁵ Ni sa sega na vakananumi iko e na mate: o cei ena vakamolimoli vei iko e nai bulubulu?

⁶ Au sa oca e na noqu vutugu: au sa vakanawa na noqui mocemoce e na bogi kecega; au sa vakasuasuataka na noqui davodavo e na wai ni mataqu.

⁷ Sa buawa na mataqu e na vuku ni noqu rarawa; sa qase mai e na vukudra kecega na noqu meca.

⁸ Dou lako tani vei au, koi kemudou kecega sa kitaka na ca; ni sa rogoca ko Jiova na domo ni noqu tagi.

⁹ Sa rogoca ko Jiova na noqu kerekere, ena vakabauta na noqu masu ko Jiova.

¹⁰ Me ra madua kecega na noqu meca ka kidroa sara; me ra lesu tale, me ra madua vakasauri sara.