NA SAME 59 - AI VOLA TABU

Sa masuta na Kalou ko Tevita me vakabulai koya mai na nona meca, 1, 2. A nodrai valavala na nona meca, 3-7. Era na cudruvi, 8-15. Sa vakavinavinaka kokoya vua na Kalou, 16, 17.

Vua na Domo-ni-meke; Ali-tasikici. Ai vola i Tevita, ni sa talaki ko Saula, a ra sa vakatawa na vale me vakamatei koya.

¹ MO vakabulai au, noqu Kalou, maivei ira na noqu meca: mo vakarurugi au maivei ira era sa tu cake mai kivei au.

² Vakabulai au maivei ira na daucaka cala, ka vakabulai au mai na tamata dauveivakamatei.

³ Ni ra sa lawavaka na yaloqu: era sa soqoni vata na qaqa me veivala kei au; ka sega, Jiova, e na vuku ni noqu talaidredre, se na noqui valavala ca.

⁴ Era sa cici ka vakarautaki ira, ka sega e na vuku ni noqu caka cala: mo yadra mo vukei au, ka vakaraica.

⁵ Ia ko iko, Jiova, na Kalou ni lewe vuqa, na Kalou nei Isireli, mo yadra me cudruvi ira kece na veimatanitu: mo kakua ni vosoti ira na caka cala e dautalaidredre. Sela.

⁶ Era daulesu mai kei na yakavi; era osooso me vaka na koli, ka volivolita na koro.

⁷ Raica, era sa dauvosavosa e na gusudra: sa tiko nai seleiwau e na tebenigusudra: ni ra sa kaya tiko, O cei sa rogoca?

⁸ Ia ko iko, Jiova, ko na dredrevaki ira; ko na vakalialiai ira kecega na veimatanitu.

⁹ E na vuku ni nona kaukauwa, kaʼu na qaravi iko kina: ni sa noqui vakaruru na Kalou.

¹⁰ Ena liutaki au na noqu Kalou dauyalololoma: ena vakaraitaka vei au na Kalou na ka sa na yacovi ira na noqu meca.

¹¹ Mo kakua ni vakamatei ira, de na-nuleca ko ira na noqu tamata: mo vakasevi ira e nomu kaukauwa; ka vakamalumalumutaki ira sobu, Turaga na neimami sasabai.

¹² A ca ni gusudra na vosa ni tebenigusudra, ia me ra vauci ga e na nodra viavialevu; kei na vuku ni ruru kei na lasu era vosataka.

¹³ Mo vakarusai ira e na nomu cudru, vakarusai ira, me ra oti sara: ia me kilai na Kalou ni sa lewai ira na Jekope ka yacova nai yalayala kei vuravura. Sela.

¹⁴ Me ra qai lesu mai kei na yakavi; ka oso me vaka na koli, ka volivolita na koro.

¹⁵ Me ra qara kedra voli, ia kevaka era sega ni mamau, me ra ia tiko kei na bogi.

¹⁶ Ia koi au, kaʼu na meketaka na nomu kaukauwa; io, kaʼu na vakacaucautaka na nomu loloma kei na mataka: ni ko sa noqui vakaruru kei na noqui drodro e na siga kaʼu sa rarawa kina.

¹⁷ Au na sere vei iko, na noqu kaukauwa: ni sa noqui vakaruru na Kalou, na noqu Kalou dauyalololoma.