NA SAME 52 - AI VOLA TABU

Sa dokai koya ko Toeki e na nona qaqa, 1-4; ia sa na cudruvi koya na Kalou, 5-7. Sa vakararavi ki na Kalou ko Tevita, a sa vinaka kina, 8, 9.

Vua na Domo-ni-meke; a Masikili. A Meke i Tevita, ni sa lako mai ko Toeki na kai Itomi ka sa tukuna vei Saula, a sa kaya vua, Sa lako mai ko Tevita ki na vale i Eiimeleki.

¹ A CAVA ko sa vakalevulevui iko kina e na ca, o iko na tamata qaqa? a yalololoma ni Kalou sa tawa mudu rawa.

² Sa nanuma tiko na ca na yamemu; sa vaka nai toroi gata, sa caka veivakaisini.

³ O sa vinakata na ca, ka cata na ka vinaka; o sa vinakata ni ko vosa lasu, ka cata ni ko vosa dodonu. Sela.

⁴ Na gusu dauveivakaisini, ko sa vinakata na vosa kata kecega.

⁵ Ia na Kalou, ena vakarusai iko mo tawa bula tale, ena kauti iko tani, ka cavuti iko tani mai na nomui tikotiko; ka cavuti iko tani mai na vanua ni bula. Sela.

⁶ Ara na raica na yalododonu, ka rere, a ra na dredrevaki koya: ka kaya,

⁷ Raica, o qo na tamata sa sega ni vakararavi vua na Kalou me nona kaukauwa; a sa vakararavi ga e na kena levu ni nonai yau, ka vakaukauwataki koya e nonai valavala ca.

⁸ Ia koi au, kaʼu sa vaka na olive bulabula e na vale ni Kalou: au sa vakararavi tikoga e na loloma ni Kalou ka tawa mudu.

⁹ Ena tawa oti na noqu vakavinavinaka vei iko, e na vuku ni ko a cakava: kaʼu na qarava tiko na yacamu; ni sa vinaka o qo e matadra na nomu tamata yalosavasava.