NA SAME 51 - AI VOLA TABU

Sa vakatusa na nonai valavala ca ko Tevita, ka masuta na Kalou me lomani koya, ka vakabulai koya mai na nona ca.

Vua na Domo-ni-meke. A Meke i Tevita, ni sa lako mai vua ko Necani na parofita, ni sa curu oti vei Paci-sepa.

¹ LOMANI au mai, na Kalou, me vaka na nomu loloma: me vaka na kena levu ni nomu yalololoma, mo bokoca laivi na noqui valavala ca.

² Mo vakasavasavataki au sara mai na noqu caka cala, ka vuya laivi vei au na noqui valavala ca.

³ Niʼu sa vakatusa na noqu talaidredre: a sa tu ga e mataqu e na veisiga na noqui valavala ca.

⁴ Vei iko, io, vei iko duaduaga, kaʼu sai valavala ca, ka cakava e matamu na ka ca: mo dodonu rawa kina ni ko sa vosa, ka tawa cala ni ko sa lewa.

⁵ Raica, kaʼu a tawa yaladodonu niʼu a sucu; a sa kunekunetaki au ko tinaqu e nai valavala ca.

⁶ Raica, na ka dina mai na vu ni yalo ko sa vinakata: ia e na tikina sa vuni mo vakavukui au kina.

⁷ Mo savataki au e na isopi, kaʼu na qai savasava: vui au, kaʼu na qai vulavula vakalevu ka vakalailai na uca-vulavula.

⁸ Vakarogotaka vei au na ka ni marau kei na rereki; me reki rawa kina na suiqu ko sa musulaka.

⁹ Tabonaka na matamu mai na noqui valavala ca, ka bokoca laivi na noqu caka cala kece.

¹⁰ Na Kalou, mo bulia e lomaqu na yalo e savasava; ka vakavouya e lomaqu na yalo e dei.

¹¹ Kakua ni vakasevi au mai na matamu; ka kakua ni kauta tani vei au na nomu Yalo Tabu.

¹² Mo vakasuka tale mai vei au na marau ni bula sa maivei iko; ka tokoni au e na yalo tawa voraki.

¹³ Au na qai vakavulica vei ira nai valavala ca na nomu sala; a ra na saumaki mai vei iko ko ira nai valavala ca.

¹⁴ Mo vakabulai au, Kalou, na Kalou ni noqu veivakabulai, mai nai sau ni dra: ena qai meketaka vakadomoilevu na nomu yalododonu na yamequ.

¹⁵ Turaga, mo basuka na tebenigusuqu; ena qai tukuna na nomu yalololoma na gusuqu.

¹⁶ Ni ko sa sega ni vinakata nai soro meʼu cabora o qori: o sa sega ni marautaka nai soro kama.

¹⁷ Ai soro vua na Kalou na yalo sa raramusumusu; a yalo sa ramusu, ka bibivoro, ko na sega ni beca, na Kalou.

¹⁸ Mo caka vinaka ki Saioni e na nomu loloma: mo viria na bai ni Jerusalemi.

¹⁹ O na qai donuya nai soro dodonu, nai soro kama, kei nai soro sa kama taucoko: ia era na qai cabora na karavau e na dela ni nomui cabocabo-ni-soro.