NA SAME 50 - AI VOLA TABU

A dauveilewai rerevaki na Kalou, ena sega ni yaga vua nai valavala ni lotu vakailasu; sa vinakata ga nai valavala dina.

A Meke i Asafi.

¹ O KOYA sa Kaukauwa, na Kalou, io, ko Jiova, sa vosa oti, a sa kacivi vuravura mai na yasana sa cadra kina na siga ka yacova na yasana sa dromu kina.

² Mai Saioni, na koro lagilagi duaduaga, sa cila mai na Kalou.

³ Ena lako mai na noda Kalou, ena sega ni galu: ena liutaki koya e dua na buka sa daukatikati, ia ena cava vakaidina ka sa voliti koya.

⁴ Ena kaciyi lomalagi maicake ko koya, kei vuravura talega, me lewai ira na nona tamata, ena kaya,

⁵ Dou vakasoqoni ira vata na noqu tamata yolosavasava; o ira era sa ia na veiyalayalati kei au ni ra vakamatea nai soro.

⁶ Ia na lomalagi ena tukuna na nonai valavala dodonu: ni sa lewa na Kalou vakai koya ga. Sela.

⁷ Dou rogoca, na noqu tamata, ni kaʼu na vosa; o iko Isireli, kaʼu na tukuna na nomu cala: oi au ga na Kalou, na nomu Kalou.

⁸ Au na sega ni vunauci iko e na vuku ni nomui soro kei na nomui soro kama ka sa tawa mudu e mataqu.

⁹ Au na sega ni kauta tani e dua na karavau mai na nomu vale, se na koti tagane mai na nomu bai ni koti:

¹⁰ ni sa noqu ga na karavau kila kecega mai na veikaukau, kei na karavau lasa mai na veiulu-ni-vanua e vakaudolu.

¹¹ Au sa kila yadua na manumanu vuka mai na veiulu-ni-vanua: a sa tiko kei au na manumanu kecega ni vanua.

¹² Kevaka kaʼu sa viakana, kaʼu na sega ni tukuna vei iko: ni sa noqu ko vuravura, kei na ka kecega sa sinai kina.

¹³ Au na kania li na lewe ni karavau tagane, se gunuva na dra ni koti?

¹⁴ Mo cabora vua na Kalou na vakamolimoli; ka vakayacora na ka ko a vosa vavakini kina vei Koya sa Cecere sara:

¹⁵ mo masuti au talega e na siga ni rarawa: kaʼu na vakabulai iko, ia ko na vakarokorokotaki au.

¹⁶ Ia vei ira nai valavala ca, sa kaya na Kalou, A cava ko sa kitaka ni ko sa tukuna na noqu vunau, ka cavuta e gusumu na noqu veiyalayalati?

¹⁷ Ni ko sa cata tiko nai vakavuvuli, ka sa biuta ki dakumu na noqu vosa.

¹⁸ Ni ko a kunea na daubutako, ko a qai lomavata kaya, a sa votai vata kei ira na dauyalewa.

¹⁹ 0 sa solia na gusumu ki na ka ca, a sa tulia na ka lasu na yamemu.

²⁰ O sa tiko ka vosacataki koya na tacimu; o sa kaseti koya na luve i tinamu.

²¹ A ka o qo ko a kitaka, ia kaʼu a galu; ko a qai nanumi au meʼu vakataki iko sara: ia kaʼu na vunauci iko, ka tuva e matamu na nomui valavala ca o qo.

²² Dou qai nanuma na ka o qo, oi kemudou sa guilecava na Kalou, deʼu sa dresulaki kemudou, ka sega e dua me vakabula.

²³ O koya sa cabora na vakavinavinaka sa vakarokorokotaki au: ia ko koya sa vakarautaka na nona sala kaʼu na vakaraitaka vua na bula sa mai vua na Kalou.