NA SAME 5 - AI VOLA TABU

A masu i Tevita vua na Kalou me totaki koya.

Vua na Domo-ni-meke e na Neiloca. A Meke i Tevita.

¹ VAKALAKALA daligamu ki na noqu vosa, Jiova; kila na noqu nanuma.

² Vakarogoca na domo ni noqu tagi, noqu Tui kei na noqu Kalou, niʼu na masu ga vei iko.

³ E na mataka, Jiova, ko na rogoca na domoqu; e na mataka kaʼu na vakarau ga vei iko, ka ta cake.

⁴ Ni ko sa sega na Kalou sa rekitaka na ka e tawa dodonu; ena sega na ca me tiko vata kei iko.

⁵ Ena sega ni wavutu e matamu ko ira na lialia: o sa cati ira kecega era sa kitaka nai valavala ca.

⁶ O na vakarusai ira era sa vosa lasu: na tamata tauvi dra kei na dauveivakaisini ena cata sara ko Jiova.

⁷ Ia koi au, e na vuku ni nomu loloma levu, kaʼu na curu ki na nomu vale: kaʼu na cuva kivakaki na nomu vale tabu niʼu sa rerevaki iko.

⁸ Jiova, tuberi au ena nomu yalododonu e na vukudra na noqu meca; vakadodonutaka e mataqu na nomu sala.

⁹ Ni sa sega na ka dina e gusudra; sa ca sara na lomadra; ai bulubulu sa dola tu na nodrai tilotilo; era sa dau veicavilaki e na yamedra.

¹⁰ Na Kalou, mo vakacalai ira; me ra bale ga e na nodra bose; vakasevi ira e na vuku ni nodrai valavala ca e vuqa; ni ra sa dautalaidredre vei iko.

¹¹ Ia me ra reki ga ko ira kece sa vakararavi vei iko: me ra meke vakadomoilevu ga ka tawa mudu, ni ko na vakarurugi ira: me ra marautaki iko ko ira era sa lomana na yacamu.

¹² Ni sai iko, Jiova, ena vakalougatataka na yalododonu; o na vakavolivoliti koya e na loloma me vaka e nai sasabai.