NA SAME 49 - AI VOLA TABU

Sa tawa yaga ki na yaloda nai yau kei nai ukuuku vakavuravura.

Vua na Domo-ni-meke. A nodra Meke na luve i Kora.

¹ DOU rogoca na ka o qo, na tamata kecega; dou vakatu daliga, na kai vuravura kecega:

² oi kemudou vata na luve ni tamata wale, kei na turaga, na vutuniyau kei na dravudravua.

³ Ena vosataka na vuku na gusuqu; ia ena vakanananu na lomaqu ki na yalomatua.

⁴ Au na vakalakala daligaqu ki na vosa vakatautauvata: au na taurivaka na noqui bole e na api.

⁵ A cava meʼu rere kina e na siga rarawa, ni sa voliti au na nodra caka cala era lawakitaki au?

⁶ O ira era vakararavi e na nodra kamunaga, ka dokai ira e na vuku ni nodrai yau levu;

⁷ sa sega sara e dua vei ira sa volia rawa na tacina, se solia rawa vua na Kalou na kenai voli:

⁸ (ni sa ka dredre nai voli ni yalodra, a sa takali sara:)

⁹ ka me bula tiko ko koya ka tawa mudu, ka tawa vuca rawa.

¹⁰ Ni sa kunea ko koya ni ra daumate na tamata vuku, a sa daurusa talega na lialia kei na tamata sese sara, ka laiva na nodrai yau vei ira na tani.

¹¹ A lomadra dina, ni na tu ga na nodra veivale ka tawa mudu, kei na nodrai tikotiko e nai tabatamata kecega; era sa vakatoka na nodra tiki ni vanua e na yacadra.

¹² Ia na tamata sa vakarokorokotaki sa sega ni tiko dei: sa vaka wale na manumanu sa daurusa.

¹³ A nodra sala o qo na nodra lialia: ia ka sa vinakata ga na nodra vosa ko ira na nodra kawa. Sela.

¹⁴ Era sa virikotori ki nai bulubulu me vaka na sipi; ena vakani ira ko mate; ena veitali ira e na mataka ko ira na yalododonu: ena malai talega na nodra kaukauwa e nai bulubulu; ni sa nodrai tikotiko o qori.

¹⁵ Ia na Kalou ena Vakabula na yaloqu mai na kena kaukauwa nai bulubulu: ni na kauti au ko koya. Sela.

¹⁶ Kakua ni ko rere ni sa vutuniyau mai e dua, ni sa levu mai nai ukuuku ni nona vale;

¹⁷ ni na sega ni kauta yani e dua na ka ni sa mate ko koya: ena sega ni muri koya sobu na nonai ukuuku.

¹⁸ Ni sa vosavakalougatataki koya ni sa bula tiko: (ni ra na vakavinavinaka vei iko na tamata, ni ko sa caka vinaka vei iko:)

¹⁹ ena lako ga ko koya ki nai tabatamata ni nona qase; era na sega sara ni kunea tale na rarama.

²⁰ A tamata sa vakarokorokotaki, ka sega ni yalomatua, sa vaka wale na manumanu sa daurusa.