NA SAME 45 - AI VOLA TABU

A meke kei Karisito kei nai vavakoso lewe ni soro.

Vua na Domo-ni-meke e na Sosanimi. A nodra na luve i Kora; a Masikili. A Meke ni veivinakati.

¹ SA tavakerekere na yaloqu e na vosa vinaka; au sa vosataka na noqu cakacaka me nona na Tui: a yamequ na peni ni dauvolavola totolo.

² A nomu lagilagi sa uasivi cake e na nodra na luve ni tamata: sa livi ki na tebenigusumu na loloma: ia na Kalou sa vakalougatataki iko kina ka tawa mudu.

³ Mo vauca e na sagamu, na Qaqa, na nomui seleiwau, kei na nomui ukuuku kei na nomu ka vakaturaga.

⁴ Mo vodo lako tiko vakaturaga, mo mani yaco e na vuku ni dina kei na yalomalumalumu, e nai valavala dodonu; ni na vakavulici iko e na ka veivakarerei na ligamu i matau.

⁵ Sa gata na nomu gasau e na lomadra na meca ni Tui; era sa bale e matamu na veimatanitu.

⁶ Ena sega ni mudu na nomui tikotiko vakaturaga, na Kalou: ai titoko ni caka dodonu nai titoko ni nomu matanitu.

⁷ Ni ko sa vinakata nai valavala dodonu, ka cata nai valavala ca; sa lumuti iko kina na Kalou, na nomu Kalou, e na waiwai ni reki sa levu ka lailai na nodra na nomui tokani.

⁸ A nomui sulu kecega sa boi mura, kei na yasi, kei na kasia, mai na vale tabua ni Tui, era vakamarautaki iko kina.

⁹ A gonealewa vakaturaga era kenai tikovaki: sa tu ko ranadi e na ligamu i matau sa vakaisulu e na koula mai Oferi.

¹⁰ Na luvemu alewa, mo rogoca ka vakanananu, ka vakatu daligamu; mo guilecava na kai nomu, kei na vale nei tamamu;

¹¹ ena qai gadreva vakalevu na nomu lagilagi na tui: ni sa nomu Turaga ko koya; ia mo cuva ga vei koya.

¹² Ia na gonealewa ni Teiri ena mai vakamasuta na matamu e nonai loloma, ia ko ira era sa vutuniyau vei ira na tamata.

¹³ Sa vakaiukuuku na lomana taucoko na luvena alewa ni tui: sa caka ena koula na nonai sulu.

¹⁴ Ena kauti mai vua na tui e nai sulu culacula: o ira talega na gonealewa na nonai tokani era muria, era na kauti mai vei iko.

¹⁵ Era na kauti mai e na marau kei na reki: era na curu ki na vale vakaturaga ni tui.

¹⁶ O ira na luvemu era na tubu mei sosomi kei ira na tamamu, o na lesi ira me ra turaga e vuravura kecega.

¹⁷ Au na cakava na yacamu me nanumi e nai tabatamata kecega: era na vakavinavinaka kina vei iko na veimatanitu ka tawa mudu.