NA SAME 41 - AI VOLA TABU

A masu ni tamata sa kila na nona ca.

Vua na Domo-ni-meke. A Meke i Tevita.

¹ SA kalougata ko koya sa nanuma na dravudravua: ena vakabulai koya ko Jiova e na siga ni rarawa.

² Ena maroroi koya ko Jiova, ka vakabulai koya tiko: ena vakalougatataki e vuravura; o na sega ni soli koya ki na nodra veitalia na nona meca.

³ Ena vakaukauwataki koya ko Jiova ni sa bibi e na nonai mocemoce: o na cakava me vinaka kecega na nonai mocemoce ni sa mate koto.

⁴ Au a kaya, I Jiova, lomani au mai: vakamavotaka na yaloqu; niʼu a caka ca vei iko.

⁵ Sa vosavakacacataki au ko ira na noqu meca, ka kaya, Ena mate beka ninaica, me rusa na yacana?

⁶ Kevaka sa mai raica ko koya, sa na vosa vakailasu ga: sa vakasama na ka ca na vu ni yalona: ia ni sa lako kituba sa tukuna.

⁷ O ira kecega sa cati au, era na vakaso-rokakanataki au vata: era na vakananuma na ka meʼu ca.

⁸ Era kaya, Sa dua na mate ca sa kabiti koya: ia ni sa qai koto ena sega na duri cake tale.

⁹ Io, ko koya sa noqui tau vakaidina, au vakararavi vua, o koya sa kania na qau, sa vakalaqetaki au e nai bukubuku ni yavana.

¹⁰ Ia ko iko, Jiova, lomani au mai, ka vakaduri au cake tale meʼu cudruvi ira.

¹¹ A ka o qo kaʼu kila kina ni ko sa totaki au, ni sa sega ni qaqa vakaivalu vei au na noqu meca.

¹² Ia koi au, ko sa vakataudeitaki au e na noqu yalododonu, ka vakaturi au dei e matamu ka tawa mudu.

¹³ Me vakavinavinakataki ko Jiova na Kalou nei Isireli, mai na gauna sa tawa tekivu ki na gauna sa tawa oti. Emeni, Emeni.