NA SAME 39 - AI VOLA TABU

Sa tukuni ni sa ka lekaleka walega na noda bula.

Vua na Domo-ni-meke, vei Jetucuni. A Meke i Tevita.

¹ AU a kaya, Kaʼu na vakaraica noqui valavala meʼu kakua ni caka ca e na yamequ: kaʼu na qarauna ka tabonaka na gusuqu, ni ra sa tu e mataqu na tamata caka ca.

² Kaʼu a galu ka tiko lo sara, kaʼu a sega ni vosataka na ka vinaka; ia ka sa tubu kina na noqu rarawa.

³ Sa katakata na yaloqu e lomaqu, niʼu sa vakanananu sa waqa na buka: kaʼu sa qai vosa e na yamequ.

⁴ I Jiova, vakatakila vei au na noqui otioti, kei nai vakarau ni noqu gauna, se vakaevei; meʼu kila kina na noqu mate rawarawa.

⁵ Raica, ko sa lewa me sa vaka na raba ni liga na noqu veisiga; ia na noqu gauna sa tauvata vei iko kei na ka sa sega: e dina, ni ra bula sara na tamata era sa ka wale kecega. Sela.

⁶ E dina ni ra yaloyalo walega na tamata e nodra lako voli; e dina ni ra nuiqawaqawa e na ka walega: sa daukumuna vata nai yau, a sa sega ni kila, se ko cei ena tauca.

⁷ Ia o qo, Turaga, a cava kaʼu sa namaka tiko? a ka kaʼu sa namaka sa tu ga vei iko.

⁸ Vakabulai au mai na noqui valavala ca kecega: kakua ni laivi au me ra vakaisini au ko ira na lialia.

⁹ Au a galu, au na sega ni dalaga e na gusuqu; ni ko a vakayacora.

¹⁰ Kauta tani vei au na ligamu: au sa rusa ni sa yaviti au na ligamu.

¹¹ Ni ko sa vakanakuitataka na tamata ka vunauca e na vuku ni nona caka ca, ko sa vakaotia na nona lagilagi me vaka e na sarasara: e dina ni sa ka walega na tamata kecega. Sela.

¹² Rogoca na noqu masu, Jiova, ka vakatu daliga ki na noqu tagi; kakua ni galu ni sa vakawai na mataqu: niʼu sa vulagi ga vei iko, ka kai tani, me vakataki ira kece na noqu qase.

¹³ Vosoti au vakalailai mada, meʼu bula cake tale, niʼu sa bera ni lako tani eke, meʼu kakua ni kune tale.