NA SAME 38 - AI VOLA TABU

Sa vakatusa na nona ca na tamata sa kila dina na yalona.

A Meke i Tevita, me vakanananu ka kina.

¹ I JIOVA, kakua ni vunauci au e na nomu cudru: se yaviti au e na nomu cudru waqawaqa.

² Ni sa coba sara e lomaqu na nomu gasau, a sa bitaki au vakaukauwa na ligamu.

³ Sa sega na tiki ni yagoqu sa bula e na vuku ni nomu cudru; sa sega na vakacegu e na suiqu e na vuku ni noqui valavala ca.

⁴ Ni sa uasivi cake e na uluqu na noqu caka ca: me vaka nai colacola bibi kaʼu sa sega ni colata rawa.

⁵ Sa boi ca ka tetela na noqu vidikoso e na vuku ni noqu lialia.

⁶ Au sa rarawa sara; au sa vakalairoro vakalevu; au sa tagi lako e na siga ka bogi mai.

⁷ Ni sa robo na toloqu e na mate vakasisila: a sa sega na tiki ni yagoqu sa bula.

⁸ Au sa malumalumu ka musulaki sara: au a qoqolou ni sa daurarawa na yaloqu.

⁹ I Jiova, sa tu e matamu na ka kecega kaʼu sa gadreva; a sa sega ni vuni vei iko na noqu vutugu.

¹⁰ Sa ceguoca na lomaqu, sa lako tani na noqu kaukauwa: a rarama talega ni mataqu, sa takali vei au.

¹¹ A noqui tau kei na wekaqu era tu tani niʼu sa yaviti; ia na kai noqu era sa tu vakayawa.

¹² A ra virinoca nai cori ko ira sa qarai au meʼu mate: o ira talega sa qara na noqu ca era vosavakacacataki au, a ra vakasama na ka lasu e na tiki ni siga kecega.

¹³ Ia koi au, kaʼu sa vaka na didivara, kaʼu tawa rogoca; ka vaka na galu sa tawa dalaga na gusuna.

¹⁴ Ia kaʼu sa vaka e dua sa tawa rogo rawa, ka sa sega e na gusuna na veivunauci.

¹⁵ Niʼu sa namaki iko ga, Jiova: o na rogoci au, Turaga noqu Kalou.

¹⁶ Niʼu sa kaya, De ra rekitaki au: ia ni sa tidara na yavaqu, era sa vakalevui ira vei au.

¹⁷ Niʼu sa voleka ni tu vakadua, a sa tu vakadua e mataqu na noqu rarawa.

¹⁸ Niʼu na vakatusa noqui valavala ca; kaʼu na rere e na vuku ni noqu caka cala.

¹⁹ Ni ra sa tamata bula na noqu meca, a ra sa kaukauwa: ia ko ira era cati au walega era le vuqa mai.

²⁰ O ira talega era kitaka na ca mei sau ni ka vinaka era noqu meca; e na vuku ni kaʼu sa muria na ka vinaka.

²¹ Kakua ni biuti au, Jiova: noqu Kalou, kakua ni vakayawa vei au.

²² Mo kusarawa me vukei au mai, Turaga na noqui Vakabula.