NA SAME 37 - AI VOLA TABU

A tamata caka dodonu ena vinaka ga; ena ca na tamatai valavala ca.

A Meke i Tevita.

¹ KAKUA ni ko rarawa e na vukudra nai valavala ca, se vuvutaki ira na daucaka ca.

² Ni ra na selemusu kusarawa me vaka na co, me vaka na co karakarawa era na malai yani.

³ Vakararavi vei Jiova, ka caka vinaka; o na qai tiko ga e na vanua, ka vakani e na ka vakaidina.

⁴ Ia mo rekitaki Jiova; ena solia vei iko ko koya na gadreva ni yalomu.

⁵ Laiva na nomu sala vei Jiova; vakararavi talega vua, ena vakayacora ko koya.

⁶ Ia ena vakaraitaka ko koya na nomu yalododonu me vaka na rarama, kei na ka ko sa lewai kina me vaka na siga levu.

⁷ Vakarorogo vei Jiova, ka namaki koya tiko: kakua ni vakararawataki iko e na vuku i koya sa yaco e nona sala, e na vuku ni tamata sa vakayacora nona nanuma ca.

⁸ Kakua so ni cudru, biuta ga na daule-savi; kakua ni vakararawataki iko mo ia kina nai valavala ca.

⁹ Ni na muduki tani na daucaka ca; ia ko ira sa dauna-maki Jiova, era na taukena na vanua.

¹⁰ Me malua vakalailai, ena takali na tamata ca; io, ko na vakananuma na nona yasana, ia sa sega ga.

¹¹ Ia ko ira na yalomalumalumu era na taukena na vanua; ka daumarau tiko e na veivakacegui vakaidina.

¹² A tamata ca sa dauvereta na tamata dodonu, ka vakasequruquru vua e na batina.

¹³ Ena dredrevaki koya na Turaga: ni sa raica ni sa toro mai na nona siga.

¹⁴ Era sa ucuna nai seleiwau na tamata ca, ka yavia na nodra dakai, me ra vakabalei ira na dravudravua kei na luveniyali, ka vakamatei ira nai valavala dodonu.

¹⁵ Ena suaka na utodra dina na nodrai seleiwau, ena musulaki talega na nodra dakai.

¹⁶ Sa yaga vakalevu na ka lailai sa nona na tamata dodonu, ka yaga vakalailai nai yau sa nodra na tamata ca era le vuqa.

¹⁷ Ni na musulaki na taba ni tamata ca: ia ko Jiova sa tokona na tamata dodonu.

¹⁸ Sa kila tiko ko Jiova na nodra siga na yalododonu: ia na nodrai votavota ena sega ni oti rawa.

¹⁹ Era na sega ni madua e na gauna ca: era na mamau e na gauna ni dausiga.

²⁰ Ni ra na rusa na tamata ca, ia ko ira na meca i Jiova era na vaka na uro ni lami: era na vakaseavutaki; me vaka na kubou era na seavu yani.

²¹ Sa dausarava na tamata ca, ka sa sega ni kauta tale: ia na tamata dodonu sa yalololoma, ka daulomasoli.

²² Ni ra na taukena na vanua ko ira sa vakalougatataki vua; ia ko ira sa vakarusai vua ena muduki tani.

²³ Sa lewa ko Jiova nai lakolako ni tamata vinaka: a sa rekitaka ko koya na nona sala.

²⁴ Kevaka sa bale, ena sega ni vakabalei vakadua; ni sa tauri koya cake ko Jiova e na ligana.

²⁵ Au a sa gone, kaʼu sa qai qase mai; ia kaʼu a sa sega ni raica na yalododonu sa biu laivi, se na nona kawa sa vosai kedra madrai.

²⁶ Sa yalololoma tiko ko koya, a sa dausoli tiko; a sa kalougata na nona kawa.

²⁷ Biuta laivi na ka ca, ka caka vinaka; ka tiko dei ga ka tawa mudu.

²⁸ Ni sa vinakata na ka dodonu ko Jiova, ka sa sega ni biuti ira na nona era yalosavasava; era sa maroroi ka tawa mudu: ia na nodra kawa na tamata ca ena muduki tani.

²⁹ Era na taukena na vanua na yalododonu, ka tiko kina ka tawa mudu.

³⁰ Sa vosataka na vuku na gusu i koya na yalododonu, a sa vosataka na ka dodonu na yamena.

³¹ Sa tiko e lomana na vunau ni nona Kalou; ena sega ni tidara e dua nai cavucavu ni yavana.

³² Sa dau-yadravi koya na yalododonu na tamata ca, a sa dauvakasaqara me vakamatea.

³³ Ena sega ni laiva ki na ligana ko Jiova, se vakacalai koya ni sa lewai.

³⁴ Namaki Jiova, ka muria nona sala, ena qai laveti iko cake mo tiko e na vanua: ni ra sa muduki tani na tamata ca, ko na raica.

³⁵ Au a raica e dua na tamata ca ni sa kaukauwa sara, a sa tete na tabana me vaka na kau sa tei e na kena qele dina.

³⁶ Ia ka sa qai lako tani tale, ka, raica, sa takali: ia kaʼu a vakasaqarai koya, a sa tawa kune.

³⁷ Vakasama na tamata yalododonu, ka raica na daucaka dodonu: ni na vakacegu na kenai oti na tamata ko ya.

³⁸ Ia ko ira na dautalaidredre era na vakarusai vata: a kedrai oti na tamata ca me ra muduki laivi.

³⁹ A ka maivei Jiova ni ra sa vakabulai na yalododonu: a nodra kaukauwa ko koya e na gauna rarawa.

⁴⁰ Ena vukei ira talega ko Jiova, ka vakabulai ira: ena vakabulai ira mai na tamata ca, ka maroroi ira, e na vuku ni ra sa vakararavi vua.