NA SAME 33 - AI VOLA TABU

E dodonu me da vakavinavinaka vua na Kalou e na vuku ni nona loloma, kei na nona kaukauwa, kei na nona lewa; me da vakararavi talega vua.

¹ DOU rekitaki Jiova, koi kemudou sa yalodina; ni sa kilikili kei ira na yalododonu na vakavinavinaka.

² Vakamolimoli vei Jiova e na api; meke vua e nai qiriqiri e tini na kena wa.

³ Meketaka vua na meke vou; qiria vakavinaka nai qiriqiri.

⁴ Ni sa dodonu na vosa i Jiova; a sa dinadina kecega na nona cakacaka.

⁵ Sa vinakata ko koya nai valavala dodonu kei na lewa dodonu; sa sinai ko vuravura e na loloma i Jiova.

⁶ Sa cakavi na lomalagi e na vosa i Jiova; kei na lewena kecega e na cegu ni gusuna.

⁷ Sa vakasoqona vata ko koya na wai ni wasa liwa mei binibini; sa binia na wai titobu e na lololo.

⁸ Me rerevaki Jiova ko vuravura kecega; me vakarokorokotaki koya ko ira kece sa tiko e vuravura.

⁹ Ni sa kaya ko Koya, —ka sa yaco; sa vosa ko Koya,— ka sa tu mai.

¹⁰ Sa vakayacora ko Jiova na nodra bose na veimatanitu me ka wale; sa cakava na nodra vakanananu na tamata me tawa yaga.

¹¹ Ena tu ga ka tawa mudu na bose i Jiova, na nanuma ni yalona ki na veitabatamata kecega.

¹² Sa kalougata na matanitu sa nodra Kalou ko Jiova; kei na mataqali sa digitaka ko koya me nonai votavota.

¹³ Sa rai sobu mai lomalagi ko Jiova; sa raici ira kecega na luve ni tamata.

¹⁴ Mai na tikina sa tiko kina ko koya sa wanonovi ira kecega era sa tiko e vuravura.

¹⁵ Sa cakava kece vata ga na yalodra ko koya; a sa vakananuma kecega na nodrai valavala.

¹⁶ Sa sega e dua na tui sa bula e na vuku ni mataivalu levu; sa sega na qaqa me vakabulai e na nona kaukauwa levu.

¹⁷ A ka lasu na ose mei Vakabula; sa na sega ni vakabula e dua e na nona kaukauwa levu.

¹⁸ Raica, a mata i Jiova sa wanonovi ira era sa rerevaki koya, ko ira era sa vakararavi e na nona loloma;

¹⁹ me Vakabula na yalodra mai na mate, me maroroya na nodra bula e na dausiga.

²⁰ Sa waraki Jiova na yaloda; a nodai vukevuke kei na nodai sasabai ko koya.

²¹ Ni na rekitaki koya na yaloda, ni da a vakararavi e na yacana tabu.

²² I Jiova, me tu ga vei keimami na nomu loloma, me vaka ni keimami sa dinati iko.