NA SAME 30 - AI VOLA TABU

A vakavinavinaka vua na Kalou e na vuku ni sa dauvakabulai ira na nona tamata.

A Meke kei na Sere i Tevita ni sa curuma na Vale.

¹ AU na vakavinavinaka vei iko, Jiova, ni ko sa laveti au kicake; ka sa sega ni laivi ira na noqu meca me ra reki e na vukuqu.

² I Jiova noqu Kalou, kaʼu a tagi vei iko, ia ko sa vakabulai au.

³ I Jiova, ko a tubera cake na yaloqu mai nai bulubulu; ko sa maroroya noqu bula, meʼu kakua ni lako sobu ki nai bulubulu.

⁴ Dou meke vei Jiova, koi kemudou na nona tamata yalosavasava, ka vakavinavinaka ni dou nanuma na nona yalododonu.

⁵ Ni sa cudru ka sa oti vakasauri; sa tu vata na bula kei na nona loloma; ena tiko na tagi kei na bogi; a sa ia ga e na mataka na marau.

⁶ Ia niʼu a tiko vinaka kaʼu sa kaya, Kaʼu na sega tale ni vakayavalati.

⁷ I Jiova, e na nomu loloma ko sa vakataudeitaka sara na noqu ulu-ni-vanua: ia ko sa vunia na matamu, kaʼu sa taqaya.

⁸ Au na tagi vei iko, Jiova; kaʼu na cakava vei Jiova na noqu masumasu.

⁹ A cava na betena na noqu dra, niʼu sa lako sobu ki nai bulubulu? Ena vakavinavinaka beka vei iko na kuvu-ni-soso? ena tukuna beka na nomu dina?

¹⁰ Rogoca, Jiova, ka lomani au mai; vukei au mai, Jiova.

¹¹ O sa vukica vei au na noqu tagi me marau; o sa luvata, na noqui sulu taqarotu, ka vauci au e na rereki;

¹² me meke kina vei iko na yamequ; me kakua sara ni galu. I Jiova noqu Kalou, kaʼu na vakavinavinaka vei iko ka tawa mudu.