NA SAME 3 - AI VOLA TABU

Sa tiko vinaka sara ko ira sa maroroi ira na Kalou. A Meke i Tevita, ni sa drotaki Apisalomi na luvena.

¹ I JIOVA, na ka tani na tamata sa tubu me vakararawataki au! era sa lewe vuqa sa tu cake me bolei au.

² Era sa lewe vuqa sa kaya ki na yaloqu, me vakane, Sa na sega sara ni vakabulai koya na Kalou. Sela.

³ Ia ko iko, Jiova, nai vakaruru vei au; na noqui ukuuku, kei koya sa laveta cake na uluqu.

⁴ Au a tagi vei Jiova e na domoqu, a sa rogoci au ko koya mai na nona ulu-ni-vanua tabu. Sela.

⁵ Au a davo no ka moce; au a yadra tale; ni sa maroroi au ko Jiova.

⁶ Au na sega ni rerevaki ira era udolu vakatini, era sa vakavolivoliti au vakaivalu.

⁷ Tu cake, Jiova; vakabulai; au, noqu Kalou; ni ko sa yaviti ira kecega na noqu meca e na sui ni baludra; o sa musulaka na batidra na tamata ca.

⁸ Sa maivei Jiova na veivakabulai: me tu vei ira na nomu tamata na nomu vosaveivakalougatataki.