NA SAME 27 - AI VOLA TABU

A masu me vakabulai mai na meca e vuqa; a sa vakaukauwataki.

A Meke i Tevita.

¹ A NOQU rarama kei na noqui vakabula ko Jiova; meʼu rerevaki cei? a kaukau wa ni noqu bula ko Jiova; meʼu taqaya e navuku i cei?

² Ni ra sa lako vakaivalu mai vei au na tamata ca kei na noqu meca me kania na lewequ, era sa tarabe ka bale.

³ Kevaka sa mai kabai au na mataivalu e le vuqa, ena sega ni rere na yaloqu: kevaka sa tubu vei au nai valu, kaʼu na vakararavi ga ni sa vakakina.

⁴ E dua na ka kaʼu sa gadreva maivei Jiova, o qori ga kaʼu na vakasaqara; meʼu tiko e na vale i Jiova e na veisiga kecega ni noqu bula, meʼu vakaraica na lagilagi i Jiova, ka vakatarotaro tiko e na nona vale ni soro.

⁵ Ni na vunitaki au e na nona vale e na gauna ni rarawa: ena vunitaki au e na yasana vuni e na nona vale malo: ena vakaturi au ki na dela ni vatu.

⁶ Ena qai laveti cake na uluqu me uasivi vei ira na noqu meca era sa vakavolivoliti au: ia kaʼu na cabora nai madrali ni marau e na nona vale malo; kaʼu na meke; io, kaʼu na meketaka na vakavinavinaka vei Jiova.

⁷ Rogoci au, Jiova, niʼu sa tagi e na domoqu: lomani au talega, ka vosa mai vei au.

⁸ Ni ko sa kaya, Dou vakasaqara na mataqu; sa kaya vei iko na yaloqu, A matamu, Jiova, kaʼu na vakasaqara.

⁹ Kakua ni vunia na matamu vei au; kakua ni biliga tani na nomu tamata ni ko sa cudru: o iko ga na noqui vukevuke; kakua ni vakatalai au tani, se laivi au, Kalou na noqui Vakabula.

¹⁰ Ni sa laivi au na tamaqu kei na tinaqu, ena qai keveti au cake ko Jiova.

¹¹ Vakavulici au, Jiova, e na nomu sala, ka tuberi au e na sala dodonu, e na vukudra na noqu meca.

¹² Kakua ni soli au ki na nodra veitalia na noqu meca: ni sa tu cake vei au ko ira na dauveibeitaki vakailasu, kei ira era sa cavuta tiko na vakacaca.

¹³ Kevaka kaʼu a sega ni dinata me raica na yalovinaka i Jiova e na vanua ni bula, kau a malumalumu ga.

¹⁴ Mo waraki Jiova: gugumatua, ena qai vakataudeitaka na yalomu ko koya: io, mo waraki Jiova ga.