NA SAME 26 - AI VOLA TABU

A masu ni tamata e vereti ni sa lasutaki, a sa vakararavi ga e na Kalou.

A Meke i Tevita.

¹ I JIOVA, mo lewai au; niʼu a muria lako na noqu yalododonu: au a vakararavi talega vei Jiova; kaʼu na tawa yavala.

² Mo vakadikevi au, Jiova, ka vakatovolei au; vakatovolea na noqui ivi kei na utoqu.

³ Ni sa tu ga e mataqu na nomu yalololoma: kaʼu sa muria lako talega na nomu dina.

⁴ Au a sega ni tiko vata kei ira na tamata lasu, kaʼu na sega talega ni nodra lewe ni sala era dauveivakaisini,

⁵ Au sa cata nai vavakoso tamata caka ca; kaʼu na sega ni tiko vata kei ira nai valavala ca.

⁶ Au na vuluvulu na ligaqu meʼu sa tawa cala: kaʼu na vakavolivolita vakakina na nomui cabocabo-ni-soro, i Jiova:

⁷ meʼu vakarogotaka e na domo ni vakavinavinaka, ka tukuna kecega na nomu cakacaka e veivakidacalataki.

⁸ I Jiova, au a vinakata na tikina ni nomu vale, kei na yasana sa tiko kina na nomui ukuuku.

⁹ Kakua ni soqona vata na yaloqu kei ira na tamata ca, se na noqu bula kei ira na tamata dauveivakamatei:

¹⁰ sa tiko e na ligadra na ca, a sa sinai na ligadra i matau e na tautauri ni vere.

¹¹ Ia koi au, kaʼu na muria lako na noqu yalododonu: vakabulai au, ka lomani au mai.

¹² Sa tu ga na yavaqu e na vanua vinaka: kaʼu na vakavinavinaka vei Jiova e nai vavakoso.