NA SAME 24 - AI VOLA TABU

Sa tukuna na ka sa nei Jiova, kei na tamata sa yaga vua, kei na nona curu ki lomalagi.

A Meke i Tevita.

¹ A NEI Jiova ko vuravura, kei na ka kecega sa sinai kina; a veivanua kei ira era sa tiko kina.

² Ni sa tauyavutaka ko koya e na wasa levu, a sa vakataudeitaka e na wai drodro.

³ O cei ena cabe cake ki na ulu-ni-vanua i Jiova? se ko cei ena tu e na nona tikina tabu?

⁴ O koya sa liga savasava ka yalosavasava; o koya sa sega ni laveta cake na yalona ki na ka walega, se vosa vavakini vakailasu.

⁵ Ena rawata ko koya na veivakalougatataki maivei Jiova, kei na veivakadonui mai na Kalou na nonai Vakabula.

⁶ O qori nai tabatamata sa vakasaqarai koya, era sa vakasaqara na matamu ko ira na Jekope. Sela.

⁷ Dou laveta cake na ulumudou, koi kemudou na matamata-ni-koro; ia dou laveti cake, koi kemudou na kenai sogo sa tawa oti rawa; me curu kina na Tui vakaiukuuku.

⁸ O cei o qo na Tui vakaiukuuku? O Jiova sa kaukauwa ka qaqa, o Jiova sa kaukauwa e nai valu.

⁹ Dou laveta cake na ulumudou, koi kemudou na matamata-ni-koro; ia dou laveti cake, koi kemudou na kenai sogo sa tawa oti rawa: me curu kina na Tui vakaiukuuku.

¹⁰ O cei o qo na Tui vakaiukuuku? O Jiova ni lewe vuqa, o koya ga na Tui vakaiukuuku. Sela.