NA SAME 22 - AI VOLA TABU

Sa tagi vua na Kalou ko Tevita ni sa vakararawataki ka rere, 1-10, masu vua, 11-21. Sa qai vakavinavinaka, 22-31.

Vua na Domo-ni-meke e na Aijeleca Saara. A Meke i Tevita.

¹ NOQU Kalou! noqu Kalou! o sa biuti au e na vuku ni cava? a cava ko sa yawa kina ka tawa vakabulai au, se rogoca na vosa ni noqu tagi?

² Noqu Kalou! au sa kaci e na siga, ia ko sa sega ni rogo mai; kei na bogi talega, ia kaʼu sa sega ni vakacegui.

³ Ia ko sa yalosavasava ga, ko iko sa tiko kei na nodra dauvakavinavinaka na Isireli.

⁴ Sa vakararavi vei iko ko ira na tama i keitou: era a vakararavi vei iko, ia ko a vakabulai ira.

⁵ Era a qoqolou vei iko, a ra sa vakabulai: era a vakararavi vei iko, a ra sa tawa vakamaduataki.

⁶ Ia koi au na baca, ka sega ni tamata; a ka era vakasewasewana na tamata, a ra sa beca ko ira na lewe vuqa.

⁷ Era sa dredrevaki au ko ira kece era sa raici au: era vaka-be gusu, era sa kuretaka na uludra, ka kaya,

⁸ Sa vakararavi vei Jiova ko koya o qo me vakabulai koya: me mani vakabulai koya ga, kevaka e sa rekitaka.

⁹ Ia sai iko sa kauti au mai na kete i tinaqu: o sa maroroi au niʼu sa sucuma tiko na sucu i tinaqu.

¹⁰ Au a biuti ga vei iko niʼu sa qai sucu: o iko na noqu Kalou niʼu sa qai lako mai na kete i tinaqu.

¹¹ Kakua ni ko sudra tani vei au; ni sa toro voleka mai na rarawa; a sa sega e dua me vukei au.

¹² Sa vakavolivoliti au na karavau tagane e le vuqa; sa tu vakavolivoliti au na karavau tagane kaukauwa ni Pasani.

¹³ Sa dalaga na gusudra vei au, me vaka na laioni sa dauveidresulaki ka dautagi.

¹⁴ Au sa sovaraki yani me vaka na wai, a sa mavule kecega nai sema ni suiqu: sa yaco me vaka na drega ni vola na yaloqu, sa waicala e loma ni ketequ.

¹⁵ Sa mamaca na noqu kaukauwa me vaka nai caca ni bilo, a sa kabi ki na sui ni galegalequ na yamequ; o sa lesi au ki na kuvu-ni-soso ni mate.

¹⁶ Ni sa vakavolivoliti au ko ira na koli: era sa vakavolivoliti au nai vavakoso era tamata lomaca: era sa coka na ligaqu kei na yavaqu.

¹⁷ Au sa wilika kecega na suiqu: e sa wanonovi au ka vakaraici au matua.

¹⁸ Era sa vota vei ira na noqui sulu, a ra sa vakalutuka na madigi e na noqui tutuvi.

¹⁹ Ia ko iko, Jiova, mo kakua ni yawa vei au: na noqu kaukauwa, mo kusarawa me vukei au.

²⁰ Vakabula na yaloqu mai nai seleiwau; na noqu ka duaduaga mai na kaukauwa ni koli.

²¹ Vakabulai au mai na gusu ni laioni: ni ko a rogoci au mai na kaukamea ni yunikoni.

²² Au na vakatusa na yacamu vei ira na taciqu: e na kedra maliwa nai vavakoso lewe ni soro kaʼu na vakavinavinaka vei iko.

²³ Oi kemudou sa rerevaki Jiova, dou vakavinavinaka vua; dou vakamolimoli vua, koi kemudou kecega na kawa i Jekope; dou rerevaki koya, koi kemudou kecega na kawa i Isireli.

²⁴ Ni sa sega ni beca se cata na rarawa i koya sa vakararawataki; a sa sega ni vunia vua na matana; a sa rogoci koya, ni sa tagi vua.

²⁵ Au na vakamolimoli ga vei iko e nai soqosoqo levu: na ka kaʼu a yalataka kaʼu na kitaka e na matadra era rerevaki koya.

²⁶ Era na kana ka mamau ko ira sa yalomalumalumu: era na vakavinavinaka vei Jiova ko ira era sa vakasaqarai koya: ena bula na yalomudou ka tawa mudu.

²⁷ Era na vakanananu kecega nai yalayala kei vuravura, ka saumaki vei Jiova: era na cuva e matamu ko ira kecega na veimataqali ni veivanua.

²⁸ Ni sa nei Jiova na matanitu; ia ko koya ga sa turaga vei ira na veivanua.

²⁹ O ira kecega era sa uro e vuravura, era na kana ka cuva: kei ira kecega era lako sobu ki na kuvu-ni-soso era na tekiduru vua: a sa sega e Vakabula rawa na yalona.

³⁰ Ena qaravi koya e dua na kawa; ena okati vua na Turaga me nona kawa.

³¹ Era na lako mai ka vakatusa na nona yalododonu vei ira na tamata era na sucu mai, ni sa cakava o qori ko koya.