NA SAME 19 - AI VOLA TABU

Sa tukuni Jiova na nona cakacaka, kei na nona vosa.

Vua na Domo-ni-meke. A Meke i Tevita.

¹ SA tukuna nai ukuuku ni Kalou ko lomalagi; a sa vakatakila na cakacaka ni ligana na cagi-maliwa.

² Sa dautukuna na vosa na veisiga sa veitaravi, a sa vakaraitaka na vuku na veibogi sa veitaravi.

³ Sa sega nai tukutuku, sa sega na vosa, sa sega ni rogo na domodra.

⁴ A sa lako yani ga ki vuravura kecega na nodrai vakarau, kei na nodra vosa ki nai yalayala kei vuravura. Sa viritaka ko koya me tu maikina na nona vale na mata-ni-siga,

⁵ o koya o qo sa vakana tagane sa qai vakawati sa lako mai na nonai vakaruru vakaiukuuku, a sa marau me vaka na qaqa ni sa laʼki cici cere.

⁶ Sa vakatekivu na nonai cadracadra e na vu ni lagi, kei na nonai lakolako sa yacova na kenai yalayala: a sa sega na ka sa vuni mai na kena katakata.

⁷ Sa vinaka sara na vunau i Jiova, a sa saumaka na yalo: sa dina nai tukutuku i Jiova, a sa vakavukui ira na tawa vuku.

⁸ Sa dodonu nai lesilesi i Jiova, a sa vakamarautaka na yalo: sa savasava nai vakaro i Jiova, a sa vakararamataka na matada:

⁹ sa savasava na rerevaki Jiova, a sa tu dei ka tawa mudu: sa dina na lelewa i Jiova, a sa dodonu kecega.

¹⁰ A ka o qo sa daugadrevi vakalevu cake e na koula, io, na koula dina e levu: sa uasivi cake e na oni na kena kamikamica, io, e na qa ni oni.

¹¹ Sa vakasalataki talega na nomu tamata e na ka o qo: a sa levu na kenai sau ni sa vakabauti.

¹² O cei sa kila rawa na nona caka cala? mo vakasavasavataki au mai nai valavala ca sa vuni tu.

¹³ Tarova talega na nomu tamata mai na be; me kakua ni gumatua vei au: kaʼu na qai dodonu sara, kaʼu na sega talega ni cala e nai valavala ca levu.

¹⁴ Me vinaka e matamu na vosa ni gusuqu, kei na vakanananu ni yaloqu, i Jiova, na noqu uluvatu, kei na noqui vakabula.