NA SAME 18 - AI VOLA TABU

Vua na Domo-ni-meke. A Meke i Tevita, na tamata nei Jiova, o koya sa vosataka vei Jiova na vosa o qo e na siga sa vakabulai koya kina ko Jiova mai na ligadra kecega na nona meca, mai na liga i Saula talega: a sa kaya.

¹ AU na lomani iko, Jiova, na vu ni noqu kaukauwa.

² A noqu Uluvatu ko Jiova, kei na noqui drodro, kei na noqui vakabula; a noqu Kalou, o koya na noqu kaukauwa, kaʼu na vakararavi vua; a noqui sasabai, kei na ka kaukauwa kaʼu sa vakabulai kina, kei na noqu tikina cecere.

³ Au na kaci vei Jiova, o koya sa dodonu me vakarokorokotaki; kaʼu na vakabulai kina maivei ira na noqu meca.

⁴ Sa viviraki au nai vau ni mate, a ra sa vakarerei au ko ira na ca e vaka na waluvu.

⁵ Sa voliti au nai vau ni bulubulu: sa taumadaki au nai cori ni mate.

⁶ E na noqu rarawa kaʼu sa kaci vei Jiova, ka tagi vua na noqu Kalou: sa rogoca na domoqu ko koya mai na nona vale tabu, a sa yaco ki na matana na noqu tagi, io, ki na daligana.

⁷ Sa qai yavala ka tavuki na vanua; sa sautaninini ka yavavala na yavu ni veiulu-ni-vanua, e na vuku ni sa cudru ko koya.

⁸ Sa lako cake na kubou mai na ucuna, kei na buka waqa katakata mai na gusuna: sa vakacaudrevi kina na qilaiso ni buka.

⁹ Sa vakalolovirataka talega na lomalagi ko koya, ka lako sobu mai; sa butobuto e na ruku ni yavana.

¹⁰ A sa vodoka na Jerupi, a sa vuka: io, sa vuka mai e na taba ni cagi.

¹¹ Sa cakava na butobuto me nona yasana vuni e voliti koya, me nonai vakaruru; io na wai butobuto kei na o loaloa ni lomalagi.

¹² Sa seavu na bewabewa loaloa e nai serau ni matana; —na uca-cevata kei na qilaiso katavera!

¹³ Sa kurukuru talega ko Jiova mai na lomalagi, a sa tabalaka cake na domona ko Koya sa Cecere sara; —na uca-cevata kei na qilaiso katavera!

¹⁴ A sa tala na nona gasau ko koya, ka vakaseba-yaki ira; a sa vanataka na livaliva, ka vakubutaki ira.

¹⁵ A sa qai rairai mai na dreke ni wai, a sa votu mai na yavu kei vuravura e na vuku ni ko sa vunauca, Jiova, e na vuku ni sa liwa na cagi ni nomu cudru.

¹⁶ Sa talaki maicake ko koya, sa tauri au, sa vueti au cake mai na wai e vuqa.

¹⁷ Sa vakabulai au mai na noqu meca kaukauwa, maivei ira talega era sa cati au: ni ra sa gumatua vei au.

¹⁸ Era sa taumadataki au e na siga ni noqu rarawa, ia ka sa tokoni au ko Jiova.

¹⁹ Sa kauti au yani talega ko koya ki na yasana rabailevu; sa vakabulai au ko koya, e na vuku ni sa vinakati au.

²⁰ Ena sauma vei au ko Jiova na noqu yalododonu; me vaka na kena savasava na ligaqu ena sauma vei au ko koya.

²¹ Niʼu a vakabauta na sala i Jiova, ka sega ni lesu tani vakaca vua na noqu Kalou.

²² N i sa tu e mataqu na nona lewa kecega: kei na nona vunau kaʼu sa sega ni biuta tani vei au;

²³ kaʼu a yalododonu talega e matana, kaʼu a maroroi au mai na noqui valavala ca;

²⁴ o koya o qo sa sauma kina vei au ko Jiova na noqui valavala dodonu; me vaka na kena savasava na ligaqu e matana.

²⁵ O na vakatakila na nomu loloma vua sa dauloloma; o na vakatakila na nomu yalododonu vua sa yalododonu;

²⁶ o na vakatakila na nomu yalosavasava vua sa yalosavasava; o na vala kaya sa yaloveve.

²⁷ Ni ko na vakabulai ira na tamata sa vakararawataki; ia ko na vakabalei ira sa mata viavialevu.

²⁸ Ni ko na vaqa-waca na noqu cina; ena vakararamataka na noqu butobuto ko Jiova na noqu Kalou.

²⁹ Ni sai iko kaʼu sa cici bula kina e na maliwa ni Mataivalu, ia sai koya na noqu Kalou kaʼu sa ladeva kina na bai.

³⁰ Ia na Kalou, sa dodonu na nonai valavala: sa vakatovolei na vosa i Jiova; ai sasabai ko koya vei ira kecega era sa vakararavi vua.

³¹ Ni sai cei me Kalou, ko Jiova duaduaga? ia ko cei tale sa kaukauwa, na noda Kalou duaduaga?

³² A Kalou ga sa vauca na toloqu e na kaukauwa, a sa vakadodonutaka na noqui lakolako.

³³ Sa cakava na yavaqu me tautauvata kei na nodra na koti kila, a sa vakaturi au e na noqu vanua cecere.

³⁴ Sa vakavulica na ligaqu me ia nai valu, a sa musuki kina e na ligaqu na dakai kaukamea.

³⁵ O sa solia talega vei au nai sasabai ko sa vakabulai au kina; a sa vakataudeitaki au na ligamu i matau, a sa vakalevutaki au na nomu yalomalua.

³⁶ O sa vakagagataka na noqu sala vei au: a sa sega ni tidara kina na yavaqu.

³⁷ Au a vakasavi ira na noqu meca, ka vauci ira: au sa sega ni lesu tale mai, era sa kawaboko mada eliu.

³⁸ Au sa vuetaki ira, a ra sa sega ni wavutu rawa: era sa bale sobu e na ruku ni yavaqu.

³⁹ Ni ko sa vauca na toloqu e na kaukauwa me ia nai valu: o sa vakamalumalumutaki ira vei au era sa tu cake vakaivalu vei au.

⁴⁰ O sa solia talega vei au na domodra na noqu meca; meʼu vakarusai ira era sa cati au.

⁴¹ Era sa tagi yani, a sa sega e dua nai vakabula: to, vei Jiova, a sa sega ni vosa vei ira.

⁴² Kaʼu sa qai vurumemeataki ira me ra vaka na kuvu-ni-soso e na mata ni cagi: kaʼu a biuti ira tani me vaka na lolobo e nai saqata.

⁴³ O sa vakabulai au mai na nodra veileti na tamata; o sa cakavi au meʼu liu vei ira na veimatanitu: a tamata kaʼu a tawa kilai ira era na qaravi au.

⁴⁴ Ni ra sa qai rogoci au, era na talairawarawa vei au: era na vakamalumalumutaki ira vei au ko ira na kai tani.

⁴⁵ Era na malai yani ko ira na vulagi, era na rere mai na nodra tikina kaukauwa.

⁴⁶ Sa bula ko Jiova; ia me vakarokorokotaki ko koya na noqu Uluvatu: me vakalevulevui na Kalou sa vakabulai au.

⁴⁷ O koya ga na Kalou sa cudruvaki au, a sa vakamalumalumutaki ira na tamata vei au.

⁴⁸ Sa vakabulai au ko koya maivei ira na noqu meca: io, ko sa laveti au meʼu uasivi cake vei ira era sa tu cake vakaivalu vei au: o sa vakabulai au mai na tamata lomaqa.

⁴⁹ O koya o qo kaʼu na vakamolimoli kina vei iko, Jiova, e na kedra maliwa na lewe ni veivanua, kaʼu na meketaka na yacamu.

⁵⁰ O koya sa ia me ka levu sara na nona vakabulai koya na nona tui; a sa kitaka na loloma vua sa lumuta ko koya, vei Tevita kei na nona kawa ka tawa mudu.