NA SAME 17 - AI VOLA TABU

A masu sa ia e na gauna ni veivakacacani.

A masu i Tevita.

¹ MO rogoca, Jiova, na kena dodonu, vakarorogo ki na noqu tagi, rogoca na noqu masu, sa tawa lako mai na tebenigusu lasulasu.

² Me lako dina mai na matamu na vosa e na vukuqu; me vakaraica ga na matamu na ka e dodonu.

³ O sa vakatovolea na yaloqu; o sa lako mai vei au e na bogi; o a vakatovolei au sara, sa sega na ka ko na kunea; sa yaloqu ga me sega ni lako vakatani na gusuqu.

⁴ E na vuku ni nodra cakacaka na tamata, kaʼu a maroroi au mai na nona sala na dauveivakarusai e na vosa ni tebenigusumu.

⁵ Vakataudeitaka na noqu lako e na nomu sala, me kakua ni yavala nai lakolako ni yavaqu.

⁶ Au sa tagi vei iko, ni ko na rogoci au, na Kalou: vakarorogo kivei au, io, ki na noqu vosa.

⁷ Vakatakila mai na nomu loloma e veivakidacalataki, o iko ko sa vakabulai ira e na ligamu i matau, era sa vakararavi ga vei iko, maivei ira era sa tu cake mai.

⁸ Maroroi au me vaka na yaloyalo ni loa ni mata, vunitaki au niʼu vakaruru ki ruku ni tabamu,

⁹ maivei ira na tamata ca era sa vaqeavutaki au, maivei ira na noqu meca era sa vakavolivoliti au meʼu mate.

¹⁰ Era sa lawakovuni e na nodra uro; a sa vosataka na ka qaciqacia na gusudra.

¹¹ Era sa vakavolivoliti keitou e na neitoui lakolako kecega: a sa wanonova na qele na matadra.

¹² O koya o qo sa tautauvata kei na laioni sa via ia na veidresulaki; kei na luve ni laioni sa vuni tu e na yasana vuni.

¹³ Tu cake, Jiova, taumadaki koya, ka vakabalei koya sobu: vakabula na yaloqu mai na tamata ca, e na nomui seleiwau;

¹⁴ maivei ira na tamata era sa ligamu, Jiova, maivei ira na tamata ni vuravura o o era rawata nodrai vota e na nodra bula o qo, o sa vakamamautaka na ketedra e na nomui yaya vuni; sa mamau tu na luvedra, a ra sa tataunaka na vo ni nodrai yau me nodra na luvedra lalai.

¹⁵ Ia koi au, kaʼu na raica na matamu e na yalododonu: kaʼu na qai cegu niʼu sa yadra tale, ka sa ucui ko.