NA SAME 148 - AI VOLA TABU

Me ia na vakavinavinaka vei Jiova.

¹ DOU ia vei Jiova na vakavinavinaka. Dou vakavinavinaka vei Jiova mai na lomalagi: dou vakavinavinaka vua mai na vanua cecere.

² Dou vakavinavinaka vua, na nona agilose kecega: dou vakavinavinaka vua, na nonai valu kecega.

³ Drau vakavinavinaka vua, na mata-ni-siga kei na vula: dou vakavinavinaka vua, na kalokalo caucaudre kecega.

⁴ Dou vakavinavinaka vua, na lomalagi e cake sara, kei na wai sa sivia na lomalagi.

⁵ Me ra ia na vakavinavinaka ki na yaca i Jiova: ni sa vosa ko koya, a sa buli mai.

⁶ A sa vakataudeitaka ko koya me yacova na gauna kecega: sa lesia ko koya na kedrai yalayala me tawa sivia rawa.

⁷ Dou vakavinavinaka vei Jiova mai vuravura, na tavuto, kei na ka kecega e na wai titobu:

⁸ na buka waqa, kei na uca-cevata; na uca-vulavula, kei na kabukabu; na cagi liwa, ni sa vakayacora tiko na nona vosa;

⁹ na ulu-ni-vanua, kei na ulu-ni-koro kecega; a kau vuavua, kei na sitari kecega:

¹⁰ a manumanu kila, kei na manumanu lasa kecega; a ka sa dolo; kei na manumanu vakatabana:

¹¹ a tui kei vuravura, kei na veimataqali kecega; a turaga, kei na dauveilewai kecega kei vuravura:

¹² a gonetagane, kei na gonealewa; a tamata qase, kei na tamata cauravou:

¹³ me ra ia na vakavinavinaka ki na yaca i Jiova: ni sa ka talei duaduaga na yacana; sa sivia na vuravura kei na lomalagi na nonai ukuuku.

¹⁴ A sa laveta cake ko koya na nodra kaukamea na nona tamata, a nodrai ukuuku na nona tamata yalododonu kecega; ia na nodra na luve i Isireli, a mataqali sa voleka vua. Dou ia vei Jiova na vakavinavinaka.