NA SAME 146 - AI VOLA TABU

Me ia na vakavinavinaka vei Jiova.

¹ DOU ia vei Jiova na vakavinavinaka. Mo vakavinavinaka vei Jiova, na yaloqu.

² Niʼu sa bula tiko kaʼu na vakavinavinaka vei Jiova; niʼu na sa rawa tiko na bula, kaʼu na meke vua na noqu Kalou.

³ Dou kakua ni vakararavi vei ira na turaga, se vua na luve ni tamata e dua, ni sa sega vua na ka me bula kina.

⁴ Sa lako tani na nonai cegucegu, a sa suka ko koya ki na kena qele; e na siga dina ko ya sa oti na ka e vakanananu kina.

⁵ Sa kalougata ko koya sa nonai vukevuke na Kalou i Jekope, o koya sa namaka tiko me vukei koya na nona Kalou:

⁶ o koya ka cakava na lomalagi, kei vuravura, na wasawasa, kei na ka kecega sa tu kina: o koya sa tawa mudu ni vakabauta na nona vosa dina:

⁷ o koya sa lewa dodonu e na vukudra era sa vakasaurarataki: o koya sa vakani ira era sa viakana. Sa sereki ira ko Jiova era sa vesuki.

⁸ Sa basuka na matadra na mataboko ko Jiova: sa vakadodonutaki ira era sa lako roko ko Jiova: sa lomani ira na yalododonu ko Jiova:

⁹ sa maroroi ira na vulagi ko Jiova; sa vakabulai ira tiko era tawa vakatamani kei na alewa dawai: ia na nodrai valavala nai valavala ca sa vukica sara.

¹⁰ Ena lewa tiko ko Jiova ka tawa mudu, io na nomu Kalou, Saioni, e nai tabatamata kecega. Dou ia vei Jiova na vakavinavinaka.