NA SAME 144 - AI VOLA TABU

Sa vakavinavinaka ko Tevita vua na Kalou e na vukuna kei ira na tamata, 1-4, ka masu me vakabulai koya vakaukauwa na Kalou, 5-10. Sa masu me vinaka na matanitu, 11-15.

A Meke i Tevita.

¹ ME vakarokorokotaki ko Jiova na noqu kaukauwa, o koya sa vakavulica na ligaqu me ia nai valu, kei nai qaqalo ni ligaqu me vala:

² o koya sa lomani au, a sa noqui drodro; na noqu tikina cecere, kei na noqui Vakabula; a noqui sasabai, kei koya kaʼu sa vakararavi kina; o koya sa vakamalumalumutaki ira vei au na noqu tamata.

³ I Jiova, a cava na tamata, mo kilai koya kina! kei na luve ni tamata, mo nanumi koya kina!

⁴ Sa vaka na ka wale na tamata: na nona veisiga sa vaka na yaloyalo sa yali rawarawa.

⁵ Mo vakalolovirataka na nomu lomalagi, Jiova, ka lako sobu mai: mo tara na veiulu-ni-vanua, ena kubou yani.

⁶ Mo vakacaudreva na livaliva, ka vakasevi ira: vanataka na nomu gasau, ka vakubutaki ira.

⁷ Dodoka mai na ligamu maicake; vueti au, ka vakabulai au mai na wai levu, mai na ligadra na luve ni kai tani;

⁸ o ira sa dauvosa vakailaisu na gusudra, ia na ligadra i matau na liga daulasu.

⁹ Au na meketaka na meke vou vei iko, na Kalou: e nai qiriqiri e tini na kena wa kaʼu na meke vei iko.

¹⁰ O koya ga sa solia vei ira na tui me ra gumatua: o koya sa vakabulai Tevita na nona tamata mai nai seleiwau ca.

¹¹ Sereki au, ka vakabulai au mai na ligadra na luve ni kai tani, o ira sa dauvosa vakailasu na gusudra, a sa liga daulasu na ligadra i matau:

¹² ia na neimami gonetagane, me ra vaka na kau ni ra sa tubu e nodra cauravou; kei na neimami gonealewa, me ra vaka na vatu e na tutu ni vale sa solo me vatu ni vale tabu:

¹³ a neimami lololo, me oso me kau rawa maikina na kakana kecega: me luvei udolu na neimami sipi, ia me udolu vakatini e na neimami yasana ni sipi:

¹⁴ me kaukauwa ki na cakacaka na neimami karavau; me kakua na veikabati kei na se; me kakua na tagi e na neimami saqata ni koro.

¹⁵ Sa kalougata na tamata, era vakakina: io, sa kalougata na tamata sa nodra Kalou ko Jiova.