NA SAME 143 - AI VOLA TABU

A masu sa ia e na gauna ni veivakacacani.

A Meke i Tevita.

¹ ROGOCA na noqu masu, Jiova, vaqara daligamu ki na noqu kerekere: mo vakarorogo vei au e nomu yalodina, kei na nomu yalododonu.

² Ia mo kakua ni ia na veilewai kei au na nomu tamata: ni na tawa dodonu e matamu e dua na tamata sa bula.

³ Ni sa vakacacana na yaloqu na meca; sa yavita ki na soso na noqu bula; sa cakavi au meʼu tiko e na vanua butobuto, me vakataki ira era sa mate makawa.

⁴ O koya sa luvu kina na yaloqu e lomaqu; sa dawai e lomaqu na yaloqu.

⁵ Au sa nanuma na gauna makawa; au sa vakanananu ki na nomu cakacaka kecega; au sa vakanananu vakalevu ki na cakacaka ni ligamu.

⁶ Au sa dodoka yani na ligaqu vei iko; sa viagunu vei iko na yaloqu, me vaka na vanua dravuisiga. Sela.

⁷ Mo rogoci au vakusarawa, Jiova: sa ciba na yaloqu: kakua ni vunia vei au na matamu, deʼu na vakai ira era sa lako sobu ki nai bulubulu.

⁸ Mo vakarogotaka mai vei au na nomu loloma e na sabogibogi; niʼu sa vakararavi vei iko: vakatakila vei au na sala meʼu lako kina; niʼu sa laveta cake na yaloqu vei iko.

⁹ Vakabulai au, Jiova, maivei ira na noqu meca: au sa vakaruru vei iko.

¹⁰ Vakavulici au meʼu cakava na nomu veitalia; ni sai iko na noqu Kalou: sa yalololoma na Yalomu; me tuberi au ko koya e na vanua dodonu.

¹¹ E na vuku ni yacamu, Jiova, mo vakabulai au: e na vuku ni nomu yalododonu mo kauta tani na yaloqu e na ka rarawa.

¹² Ia e na nomu yalololoma mo muduki ira laivi na noqu meca, ka vakawabokotaki ira era vakararawataka na yaloqu: niʼu sa nomu tamata.