NA SAME 141 - AI VOLA TABU

A masu sa ia e na gauna ni veivakacacani.

A Meke i Tevita.

¹ I JIOVA, au sa tagi vei iko: mo kusarawa mai vei au; mo vakatu daligamu, niʼu sa tagi vei iko.

² Me tikotiko ga e matamu na noqu masu me vaka nai madrali boi vinaka; kei nai cabocabo ni ligaqu me vaka nai madrali vakayakavi.

³ Mo lesia, Jiova, nai vakatawa ki na gusuqu; mo vakaraica na katuba ni tebenigusuqu.

⁴ Me kakua ni qarava na ka ca na lomaqu, me kitaka nai valavala ca kei ira na tamatai valavala ca: ia meʼu kakua ni kania na kedra ka kamikamica.

⁵ Me yaviti au ko koya na yalododonu e na yalololoma; ia me vunauci au ko koya: enai lumu ga ni ulu, ena sega ni bola na uluqu; ia kaʼu na masu ga ni ra sa rarawa.

⁶ N i sa bale e na vanua veivatu ko ira na nodra dauveilewai, era na rogoca na noqu vosa; ni sa kamikamica.

⁷ Me vaka e dua sa tasea na kau e na dela ni soso ka dri, sa veibiuyaki vakakina na suida ki na gusu ni bulubulu.

⁸ Ia sa qaravi iko ga, Jiova na Turaga, na mataqu: au sa vakararavi vei iko; kakua ni laivi au wale tu.

⁹ Maroroi au mai na tudai era kotora vei au, kei na nodrai cori nai valavala ca.

¹⁰ Me ra bale nai valavala ca ki na nodra lawa, niʼu sa dro bula duadua koi au.